हरर फिल्म ‘ममी’को टिजर सार्वजनिक (भिडियो)
माघ २५ बाट प्रदर्शनमा आउने हरर फिल्म ‘ममी’को टिजर सार्वजनिक भएको छ ।
निर्माण पक्षले आइतबार सार्वजनिक गरेको टिजरमा फिल्मका मुख्य कलाकार प्रियंका कार्की, दिया मास्के र सुलक्षण भारतीलगायतलाई स्थान दिइएको छ ।
एक मिनेट ३८ सेकेण्ड लामो टिजर हरर खुराकहरुलाई विशेष स्थान दिइएको छ । कालो बिरालो ‘अशुभ’ हुन्छ भन्ने मान्यतालाई टिजरमा अटाउने प्रयास गरेको पाइन्छ ।
टिजरमा एक बालकले भन्छन्, ‘कालो बिरालो त बोक्सीको बान हो ।’ टिजरले फिल्मका कलाकारहरुको भूमिका खुलाउँछ । साथै, यसले एउटा परिवारमा निम्तिने ‘काला विपत्ति’को कथा उठान गरेको बुझ्न सकिन्छ ।
निर्माण पक्षका अनुसार एक परिवारले कुकुरको निधनपछि कालो बिरालोलाई पालेपछि उत्पन्न हुने घटनाहरुका बारेमा फिल्म बनेको छ ।
फिल्ममा प्रियंका, दिया, शुलक्षणसहित समिप निरौला, धनश्याम जोशी, आयुषी ढकाल लगायतको अभिनय रहेको छ ।
एस ट्वान्टी फाइभको प्रस्तुतिमा निर्माण भएको यही फिल्मबाट समर निरौलाले निर्देशनमा डेब्यू गर्दैछन् । समर र पूर्णिमाको लेखन रहने यस फिल्मको निर्माता लोकराज जोशी र पूर्णिमा आफैँ हुन् ।
