अभिनेता सूर्याको घरमा प्रहरी तैनाथ
गत नोभेम्बर २ मा अमेजन प्राइम भिडियोमा रिलिज फिल्म ‘जय भीम’का हालका दिनमा चर्चामा छन् । फिल्मको दृश्यमाथि सुरु भएको विवाद समाधान हुने कुनै छाँटकाँट छैन ।
हालैमात्र वनिन्यार संग्मका प्रदेश अध्यक्षले अभिनेता सूर्या, ज्योतिका, अमेजन प्राइम भिडियो र फिल्म ‘जय भीम’का निर्देशक टीजे ग्नानवेललाई कानूनी नोटिस पठाएका थिए ।
जहाँ उनले फिल्ममा देखाइएको समुदायसँग माफी माग्दै समुदायसँग जोडिएका सबै दृश्य हटाउन माग गरेका थिए । उनले एक हप्ता भित्र मुआब्जाको रुपमा पाँच करोड रुपैंयाँ दिन माग गरेका छन् ।
यसैबीच सूर्याको घरमा प्रहरी तैनाथ गरिएको छ । फिल्ममा रहेका केही दृश्यमा आपत्ति जनाउदै अभिनेतालाई विभिन्न व्यक्तिहरुले धम्की दिइरहेका छन् । उनको टीनगरस्थित घर बाहिर पाँच हतियारधारी प्रहरी तैनाथ गरिएको छ ।
फिल्ममा इरुलर समुदायका जनजातिको बारेमा देखाइएको छ । उनीहरुलाई कसरी हिरासतमा यातना दिइन्थ्यो भन्ने देखाइएको छ । फिल्ममा हिन्दी भाषी मानिसहरुलाई एक दृश्यबाट रिस उठाएको थियो । जसमा प्रकाश राजलाई हिन्दी बोल्नका लागि एक व्यक्तिले थप्पड मार्छन् ।
अर्को एक दृश्यमा अग्नी कुण्डमलाई एक क्यालेण्डरमा देखाइएको छ । अग्नी कुण्डम वन्नियारहरुको प्रतिक हो । उजुरीमा निर्माताहरुले जानेर बुझेर क्यालेण्डरमा राखेको दाबी गरिएको छ ।
सूर्याले एक विज्ञप्ती जारी गर्दै उनको फिल्म र उनको कुनै व्यक्ति वा समुदायको अपमान गर्ने उद्देश्य नरहेको बताएका छन् ।
