‘मेरी बास्सै’का कलाकारहरू निर्देशनमा होमिँदै, बल्छी र तक्मे बूढाको फिल्म निर्देशन यात्रा सुरू
सामाजिक सञ्जाल र इन्टरनेटको पहुँच विस्तारसँगै टेलिभिजनको आकर्षण घट्दै जाँदा लोकप्रिय हाँस्य टेलिसिरियलका कलाकारहरू ठूलो पर्दातर्फ लागेका छन्। ‘तितो सत्य’का दीपकराज गिरी र दीपाश्री निरौला, ‘मेरी बास्सै’का केदार घिमिरे ‘माग्ने बूढा’ र सिताराम कट्टेल ‘धुर्मुस’, तथा ‘जिरे खुर्सानी’का जितु नेपाल ‘मुन्द्रे’ अहिले फिल्म क्षेत्रमा सक्रिय छन्।
यी चर्चित टेलिसिरियलहरूमा देखिएका धेरै कलाकारहरू अहिले फिल्ममा अभिनय र निर्माणमा व्यस्त छन्। ‘जिरे खुर्सानी’ र ‘तितो सत्य’ बन्द भइसकेका छन् भने ‘मेरी बास्सै’लाई नयाँ टिमले केही पुराना अनुहारसहित निरन्तरता दिइरहेको छ।
अब भने ‘मेरी बास्सै’बाट चर्चामा आएका दोस्रो पुस्ताका कलाकार विल्सनविक्रम राई ‘तक्मे बूढा’ र मरिचमान श्रेष्ठ ‘बल्छी धुर्बे’ फिल्म निर्देशनमा होमिएका छन्।
विल्सनविक्रमले २०८० सालमै निर्देशनमा हात हाल्ने घोषणा गरे पनि उनले घोषणा गरेका दुई फिल्म ‘सिलाम साक्मा’ र ‘लाहुरे एन्ड दाउरे’ बन्न सकेनन्। तर अब उनले ‘मैझारो’ नामक फिल्ममार्फत निर्देशन डेब्यू गर्ने पक्का भएको छ। पाँचथरमा साउन १ गतेदेखि छायाङ्कन सुरु भएको यो फिल्ममा धिरज मगर, मिरुना मगर र दिया पुन शीर्ष भूमिकामा छन्।
त्यस्तै, बल्छी धुर्बे ‘गोबर गणेश’ नामक फिल्म निर्देशनमा जुटेका छन्। यस फिल्मको कलाकार चयनको काम भइरहेको छ। हालसम्म वर्षा सिवाकोटी, पदम तामाङ, पुजन घिमिरे र सीतादेवी तिमल्सेना फाइनल भएका छन्। फिल्मको छायाङ्कन भदौको पहिलो साताबाट सुरु हुने र माघ १ गते प्रदर्शन हुने तय गरिएको छ।
एकै टेलिसिरियलबाट लोकप्रियता कमाएका बल्छी र तक्मे बूढा अब निर्देशन यात्रा कस्तो रहनेछ भन्ने चासो फिल्म क्षेत्रले राखेको छ। उनीहरूको निर्देशनमा तयार हुने फिल्मले दर्शकको कति मन जित्न सक्छ भन्ने कुराको प्रतिक्षा अब दर्शकलाई रहनेछ।
