जनकपुरधाममा गोली चल्यो, एक युवक गम्भीर घाइते
धनुषाको जनकपुरधाममा एक युवकमाथि गोली प्रहार भएको छ ।
शनिबार राति जनकपुरधाम उपमहानगरपालिका वडा नम्बर १६ स्थित बेंगाशिवपुरमा गोली प्रहारबाट कमला नगरपालिका ८ घर भएका १८ वर्षीय मुकेश मुखिया गम्भीर घाइते भएको प्रहरीले जनाएको छ ।
बेंगाशिबपुरस्थित मामा भोगी मुखियाको घरमा रहेको किराना पसलमा बसिरहेका बेला मुकेशमाथि गोली प्रहार भएको धनुषा प्रहरीले जनाएको छ ।
चिउँडो हुँदै गोली मुखियाको घाँटीमा गएर अड्किएको धनुषा प्रहरीका प्रवक्ता समेत रहेका प्रहरी नायब उपरीक्षक जीतेन्द्रकुमार बस्नेतले जानकारी दिए । घाइतेलाई राति नै उपचारका लागि काठमाडाैं पठाइएको धनुषाका प्रहरी प्रवक्ता जितेन्द्र बस्नेतले बताए ।
करिब ६ जनाको समूह बसेर कुराकानी गरिरहँदा एक्कासी उनीमाथि गोली प्रहार भएको धनुषा प्रहरी नायब उपरीक्षक बस्नेतले बताए । घटनास्थलबाट पेस्तोल बरामद भएको र गोली प्रहार गर्नेको समेत पहिचान भइसकेको उनले बताए । उनका अनुसार यस घटना विषयमा थप अनुसन्धान भइरहेको छ ।
