सिमलताल दुर्घटना : आपतकालीन प्रतिकार्य संयन्त्रमाथि उठेको प्रश्न

घटना भएको चार दिनसम्म पनि डुबेका बस फेला पार्न नसक्नु र अधिकांश यात्रुको अवस्था अज्ञात रहनुले नेपालको “आपत्कालीन प्रतिकार्य संयन्त्र निकै कमजोर देखाएको” कतिपय विज्ञहरूको भनाइ छ।

उता नेपालमा उपलब्ध उपकरणहरू तथा जनशक्तिले मात्र खोजी तथा उद्धार प्रभावकारी हुन नसकेको भन्दै सरकारले त्यसका लागि भारतको सहयोग खोजेको गृह मन्त्रालयका एक अधिकारीले पुष्टि गरेका छन्।

हरेक बिहानदेखि साँझसम्म खोजी गर्ने र अँध्यारो भएपछि त्यसलाई स्थगित गर्ने गरिँदै आएको अधिकारीहरूले जानकारी दिएका छन्।

उक्त कार्यमा सशस्त्र प्रहरी र नेपाली सेनाका गोताखोरहरू खटाइएको छ। गृह मन्त्रालयका प्रवक्ता नारायणप्रसाद भट्टराईले दिएको जानकारीअनुसार दुवै निकायका गरेर कुल २८ जना गोताखोरहरू काममा निरन्तर खटिएका छन्।