भारत न्यूजिल्याण्डसँग पराजित, सेमिफाइनल यात्रा कठिन
यूएईमा जारी टी ट्वान्टी विश्वकप क्रिकेटमा भारतले सुपर १२ को खेलमा दोस्रो हार बेहोरेको छ । आइतबार भारत न्यूजिल्याण्डसँग पराजित भयो । टस हारेर पहिला ब्याटिङ गरेको भारतले मात्र ११० रन बनाएको थियो ।
जवाफी ब्याटिङ गरेको न्यूजिल्याण्ड १४ ओभरमा ३ बलमा २ विकेट गुमाएर सजिलै लक्ष्यसम्म पुग्यो । न्यूजिल्याण्डको जितमा डारयल मिचेलले ४९ रनको योगदान दिए भने कप्तान केन विलियम्सनले नटआउट ३३ रन बनाए ।
भारतका जसप्रित बुमराहले २ विकेट लिए । अन्य बलर विकेटविहीन रहे ।
भारतलाई सस्तैमा रोक्न न्यूजिल्याण्डका ट्रेन्ट बोल्टले ३ र स्पीनर इश सोढीले २ विकेट लिए । भारतका लागि रवीन्द्र जडेजाले सर्वाधिक २६ रन बनाएका थिए । जारी प्रतियोगितामा भारतको यो दोस्रो हार हो ।
भारत यसअघि पाकिस्तानसँग पराजित भएको थियो । ६ टिम रहेको समूह २ मा भारत २ खेलमा हार बेहोरेर अंक तालिकाको पुछारमा छ । यो हारसँगै भारतको सेमिफाइनल यात्रा कठिन बनेको छ । भारतले अब अफगानिस्तान, नामिबया र स्कटल्याण्डसँग खेल्न बाँकी छ । यी तीनै खेल जिते पनि भारतले सेमिफाइनल पुग्न अन्य टिमको नतिजा कुनुपर्ने छ र रनरेटले भारतलाई झन समस्या बनाउने देखिएको छ ।
उता पहिलो जित हात पारेको न्यूजिल्याण्डले बाँकी तीन खेल जिते सेमिफाइनल पक्का गर्नेछ । उसले अब अफगानिस्तान, नामिबया र स्कटल्याण्डसँग खेल्न बाँकी छ ।
तीन खेलमा तीन जित निकालेको पाकिस्तानले लगभग सेमिफाइनल यात्रा पक्का गरिसकेको छ । उसले समूहका बलिया तीनवटै टिम भारत, न्यूजिल्याण्ड र अफगानिस्तानलाई पराजित गरिसकेको छ । उसले अब कमजोर नामिबिया र स्कटल्यण्डसँग खेल्न बाँकी छ ।
सो समूहमा अफगानिस्तान उच्च रन रेटका साथ दुई खेल जितेर अंक तालिकाको दोस्रो स्थानमा छ । नामिबयाले पनि एक जित हात पारिसकेको छ । स्कटल्याण्ड भने जितविहीन छ ।
