अर्जेन्टिनाका फरवार्ड मार्टिनेजको थप पाँच वर्ष इन्टरमा बस्ने
इटालियन सिरी ‘ए’को क्लब इन्टर मिलानका फरवार्ड लाउटरो मार्टिनेजले क्लबसँग थप पाँच वर्षका लागि सम्झौता नवीकरण गरेका छन् ।
नयाँ सम्झौतासँगै अर्जेन्टिनाका फरवार्ड मार्टिनेज सन् २०२५र२६ सिजनको अन्त्यसम्म इन्टरमै बस्नेछन् । मार्टिनेज यसअघि बार्सिलोना जाने चर्चा चलेको थियो । त्यस्तै, उनलाई भित्र्याउन प्रिमियर लिगको क्लब आर्सेनल, टोटनहमले पनि चासो देखाएका थिए ।
तथापि, २४ वर्षीय मार्टिनेजले इन्टरमा करियर अघि बढाउने निधो गरेका छन् । बेल्जियमका फरवार्ड रोमेलु लुकाकु प्रिमियर लिगको क्लब चेल्सी गएपछि इन्टरमा मार्टिनेजले अग्रपंक्तिको नेतृत्व गरेका छन् ।
‘‘यहाँ बस्दा म धेरै खुसी छु । र, अझ लामो समय यहीँ बस्न चाहन्छु,’’ नयाँ सम्झैतापछि मार्टिनेजले भने ।
उनी २०१८ मा रेसिङबाट इन्टर आएका थिए । इन्टरले २०२०र२१ को सिजनमा २४ करोड ५६ लाख युरो घाटा बेहोरेको घोषणा गरेको बेला मार्टिनेजसँग सम्झौता नवीकरण गरेको छ ।
मार्टिनेजको उत्कृष्ट प्रदर्शनप्रेरित इन्टरले गत सिजन सिरी ‘ए’को उपाधि जितेको थियो । उनले गत सिजन १७ लिग गोल गरेका थिए । यस सिजन उनले नौ खेलमा पाँच गोल गरिसकेका छन् । मार्टिनेजले इन्टरबाट १४४ खेलमा ५४ गोल गरेका छन् भने १५ गोलमा अवसर सिर्जना गरेका छन् ।
