लस एन्जलसमा आप्रवासी धरपकडविरुद्ध प्रदर्शन तीव्र, समुद्री सेना तैनाथ
लस एन्जलसमा आप्रवासीहरूमाथि भइरहेको धरपकडको विरोधमा सुरु भएको प्रदर्शन सोमबारसम्म पनि जारी रहेको छ। शुक्रबारदेखि सुरु भएको विरोध प्रदर्शन दिनदिनै तीव्र बन्दै गएको छ।
प्रदर्शन रोक्न अमेरिकी संघीय सरकारले सुरक्षात्मक कदमहरू चालेको छ। सुरुवातमा राष्ट्रिय सुरक्षा गार्ड प्रयोग गरिए पनि प्रदर्शन नियन्त्रणमा आउन नसकेपछि अब समुद्री सेना (मारिन) समेत परिचालन गरिएको छ। पछिल्लो जानकारी अनुसार, थप ७०० जना समुद्री सेना लस एन्जलसमा तैनाथ गरिएका छन्।
राष्ट्रपति डोनाल्ड ट्रम्पले प्रदर्शन रोक्न राष्ट्रिय सुरक्षा गार्ड प्रयोग गर्नु उचित निर्णय भएको बताएका छन्। तर क्यालिफोर्नियाका गभर्नर गेभिन न्युसमले यो कदमलाई असंवैधानिक ठहर गर्दै राष्ट्रपति ट्रम्पविरुद्ध अदालतमा मुद्दा दायर गरेका छन्। गभर्नर न्युसम र क्यालिफोर्नियाका महान्यायाधिवक्ता रोब बोन्टाले सोमबार संयुक्त रूपमा मुद्दा दर्ता गरेका हुन्।
न्युसमले आफ्नो अनुमति बिना राज्यमा संघीय सुरक्षाफौज पठाइएको भन्दै आपत्ति जनाएका छन्। समुद्री सेनाको प्रयोगप्रति आलोचना गर्दै उनले सैनिकहरूलाई आफ्नै नागरिकविरुद्ध प्रयोग नगर्न आग्रह गरेका छन्। “नागरिकहरूको अधिकारको रक्षामा उभिने सुरक्षाकर्मीहरू नै नायक ठहर्नेछन्,” उनले भने।
यसैबीच, प्रशासनले गिरफ्तार गरेका आप्रवासी अधिकारकर्मी र मजदुर नेता डेभिड हेराल्डलाई अदालतमा पेस गर्ने तयारी गरेको छ। हाल उनी महानगरीय बन्दी गृहमा राखिएका छन् र उनलाई नजिकैको अदालतमा उपस्थित गराइने बताइएको छ।
हेराल्डको रिहाइको माग गर्दै प्रदर्शनकारीहरू त्यहीँ रहेको पार्कमा भेला भई आन्दोलन जारी राख्ने कार्यक्रम बनाइरहेका छन्। प्रदर्शन अझ चर्किने संकेत देखिँदै गएको छ।
