अमेरिकाले युक्रेनलाई सैन्य सहायता रोक्का गर्ने ट्रम्प प्रशासनको निर्णय
अमेरिकी राष्ट्रपति डोनल्ड ट्रम्पले युक्रेनलाई दिँदै आएको सबै सैन्य सहायता अस्थायी रूपमा रोक्का गर्न आदेश दिएका छन्। अमेरिकी अधिकारीहरूका अनुसार, ह्वाइट हाउसमा युक्रेनी राष्ट्रपति भोलोदिमिर जेलेन्स्की र ट्रम्पबीच भएको भनाभनपछि उक्त निर्णय गरिएको हो।
अमेरिकी अधिकारीहरूले युक्रेनलाई दिइने सैन्य सहायताको प्रभावकारिता समीक्षा गरिने जनाएका छन्। अमेरिका युक्रेनलाई सबैभन्दा धेरै सैन्य सहायता दिने देश हो, जसअन्तर्गत हवाई प्रतिरक्षा क्षेप्यास्त्रसहितका महत्वपूर्ण अस्त्रहरू उपलब्ध गराउँदै आएको थियो।
ह्वाइट हाउसमा चर्काचर्की
ह्वाइट हाउसमा राष्ट्रपति ट्रम्प, उपराष्ट्रपति जेडी भान्स र राष्ट्रपति जेलेन्स्कीबीच तनावपूर्ण बैठक भएको बताइएको छ। ट्रम्पले जेलेन्स्कीलाई “तृतीय विश्वयुद्ध निम्त्याउने” आरोप लगाएपछि उनी चिढिएका थिए।
सोमवार फेरि ट्रम्पले जेलेन्स्कीलाई लक्षित गर्दै शान्ति सम्झौतामा समर्थन नगरेमा उनी लामो समय पदमा नरहने चेतावनी दिएका छन्। अमेरिकी विदेशमन्त्री मार्को रुबिओले युक्रेनलाई दिइएको सैन्य सहायता रोक्का गर्ने निर्णयको बचाउ गरेका छन्।
शान्ति वार्ता प्राथमिकतामा
रुबिओले भने, “राष्ट्रपति ट्रम्प विश्वका एक मात्र नेता हुन् जससँग युक्रेन युद्धलाई स्थायी रूपमा अन्त्य गराउने मौका छ। हामी रुसीहरूलाई वार्ताको टेबुलमा ल्याउन चाहन्छौँ र शान्ति सम्भव छ वा छैन भन्ने हेर्न चाहन्छौँ।”
तर पूर्वराष्ट्रपति जो बाइडनको कार्यकालमा अमेरिकी राष्ट्रिय सुरक्षा परिषद्को जिम्मेवारी सम्हालिसकेका माइकल कार्पेन्टरले ट्रम्पको निर्णयलाई आश्चर्यजनक बताएका छन्। “यो युद्धमा आक्रमणकारी र पीडित स्पष्ट छन्। रुस आक्रमणकारी हो भने युक्रेन पीडित हो, तर हामी उल्टै फरक सन्देश दिइरहेका छौँ,” उनले भने।
विरोधका स्वरहरू
डेमोक्र्याट सांसद ट्यामी डक्वर्थले सहायता रोक्का गर्ने निर्णयलाई “युक्रेनको लज्जास्पद बेवास्ता” भनेकी छन्। उनले सामाजिक सञ्जाल एक्समा लेखेकी छन्, “यो निर्णयले अमेरिकाको सुरक्षा मजबुत बनाउने छैन, बरु राष्ट्रपति पुटिनलाई थप बलियो बनाउनेछ।”
सिनेटर पीटर वेल्चले पनि एक्समा आफ्नो असन्तुष्टि जनाउँदै भनेका छन्, “पुटिन युद्ध अपराधी हुन्, जेलेन्स्की नायक हुन्, तर ट्रम्प कमजोर छन्।”
बीबीसीकी उत्तर अमेरिका संवाददाता नोमिआ इकबालका अनुसार ट्रम्प प्रशासनले युक्रेनलाई रुसी आक्रमणविरुद्धको लडाइँमा सैन्य सहायता दिनुअघि शान्ति वार्ताप्रति प्रतिबद्धता देखाउनुपर्ने शर्त राखेको छ।
युक्रेनसँग खनिज सम्झौताको प्रस्ताव
अमेरिकाले युक्रेनलाई सैन्य सुरक्षा प्रत्याभूति दिने सट्टा आर्थिक सहायता दिने प्रस्ताव अघि सारेको छ। ट्रम्प प्रशासनले युक्रेनलाई अमेरिकासँग खनिज सम्झौता गर्न र रुससँग शान्ति वार्ता गर्न आग्रह गरेको बताइएको छ।
ट्रम्पको निर्णय यस्तो समयमा आएको छ जब उनी कङ्ग्रेसलाई सम्बोधन गर्न २४ घण्टाभन्दा कम समय बाँकी छ। विश्लेषकहरूका अनुसार, उनले यो निर्णयलाई आफ्ना उपलब्धिहरूका रूपमा प्रस्तुत गर्ने सम्भावना छ।
यसैबीच, यूकेका प्रधानमन्त्री सर किअर स्टार्मरले युक्रेन युद्ध अन्त्य गर्न चारबुँदे योजना सार्वजनिक गरेका छन्। उनले यूके, फ्रान्स र अन्य सहयोगी देशहरू मिलेर युक्रेनलाई सहयोग गर्ने योजना बनाइरहेको बताएका छन्।
