हमासले थप ६ जना बन्दी रिहा गर्ने, इजरायलले गाजाबासीलाई घर फर्कन दिने
हमासले यो साता थप ६ जना बन्दी रिहा गर्ने घोषणा गरेको छ। बन्दी रिहा भएलगत्तै इजरायलले गाजाको उत्तर भागका बासिन्दालाई घर फर्कन अनुमति दिनेछ। इजरायली प्रधानमन्त्री बेन्जामिन नेतान्याहुले उक्त कदमको जानकारी दिएका हुन्।
रिहा हुने बन्दीहरूमा अर्बेल यहुद पनि समावेश रहेकी छिन्। उनलाई नछाडेकै कारण इजरायलले गाजाको उत्तर क्षेत्रका मानिसलाई घर फर्किनबाट रोक्दै आएको थियो।
यसअघि, हमासले शनिबार चार इजरायली सैन्य महिलालाई रिहा गरेको थियो। तर, इजरायलले जेलमा रहेका कैदीहरूलाई रिहा गर्नुभन्दा पहिला आफ्ना सर्वसाधारण नागरिकलाई नछाडेको भन्दै हमासले युद्धविरामको उल्लङ्घन गरेको आरोप लगाएको छ।
युद्धविराम लागू भएयता सात जना बन्दी र २०० जना प्यालेस्टिनी कैदी रिहा भइसकेका छन्। तर, हजारौँ गाजाबासी अझै घर फर्कन सकिरहेका छैनन्, किनकि इजरायली अवरोध जारी छ।
१९ जनवरीदेखि लागू भएको युद्धविरामका क्रममा हमासले दुई पटक बन्दी रिहा गरिसकेको छ। तेस्रो चरणमा हमासले शुक्रबार अर्बेल यहुदसहित अन्य दुई जनालाई रिहा गर्नेछ। कतारको मध्यस्थतामा शनिबार थप तीन जनालाई पनि रिहा गरिने भएको छ।
इजरायलले भने सोमबारदेखि गाजामा अलमलिएका मानिसलाई घर फर्कने अनुमति दिनेछ। साथै, यो साता जेलमा रहेका प्यालेस्टिनी कैदीहरूलाई पनि रिहा गर्ने जनाएको छ।
