राष्ट्रिय स्वतन्त्र पार्टीका सभापति तथा पूर्व उपप्रधानमन्त्री रवि लामिछानेमाथि सहकारी संस्थाको बचत हिनामिना र ठगी प्रकरणमा परेको संकट झन् गहिरिँदै गएको छ।
चितवनमा सहकारी ठगी प्रकरणमा पीडितहरूले बुधबार लामिछानेविरुद्ध जाहेरी दिएका छन्। चितवनका प्रहरी प्रमुख एसपी गौतम मिश्रका अनुसार सहकारी पीडित संघर्ष समितिका अध्यक्ष शालिकराम दवाडीले रवि लामिछानेसहित १० जनाविरुद्ध उजुरी दर्ता गराएका छन्।
लामिछानेसहित १० जनामाथि सहारा चितवन बहुउद्देश्यीय सहकारी संस्थाबाट भएको ठगीमा संलग्न रहेको आरोप लगाइएको छ। यस प्रकरणमा सहकारीका अध्यक्ष गितेन्द्रबाबु राई (जीबी) र नेपाल प्रहरीका पूर्व डीआईजी छविलाल जोशी समेत मुछिएका छन्।
संसदीय छानबिन समितिले सहारा सहकारीमार्फत गोर्खा मिडिया नेटवर्कमा १० करोड ८० लाख रुपैयाँ अवैध लगानी गरिएको प्रमाण फेला पारेको जनाएको छ। यो सहकारी लामिछानेको निर्वाचन क्षेत्रमा पनि कार्यरत रहेको देखिन्छ।
रवि लामिछाने र छविलाल जोशी अन्य सहकारी प्रकरणमा पनि संलग्न रहेको आशंका गरिएको छ। उनीहरू पोखरास्थित सूर्यदर्शन सहकारी, बुटवलको सुप्रिम सहकारी, पर्साको सानोपाइला, चितवनको सहारा र काठमाडौंको स्वर्णलक्ष्मी सहकारीको ठगी प्रकरणमा अनुसन्धानको दायरामा छन्।
काठमाडौंको कालिमाटीस्थित स्वर्णलक्ष्मी सहकारी ठगी प्रकरणमा अदालतले लामिछाने र जोशीविरुद्ध पक्राउ पुर्जी जारी गरिसकेको छ।
रवि लामिछाने गत कात्तिक ३ गतेदेखि कास्की प्रहरीको हिरासतमा छन्। चितवनमा पूरक जाहेरी परेसँगै अनुसन्धान अझ तीव्र हुने देखिएको छ। प्रहरीका अनुसार सबै उजुरीहरूको अध्ययन भइरहेको छ, र यसबारे थप कानुनी प्रक्रिया अघि बढ्ने छ।
