अरुण ग्रह र यसका उपग्रहमा जीवनको सम्भावना, पुरानो धारणालाई चुनौती !
वैज्ञानिकहरूले हालै गरेको अनुसन्धानले अरुण ग्रह र यसका पाँच ठूला उपग्रहहरूमा समुद्र र जीवनको लागि आवश्यक तत्वहरू हुन सक्ने संकेत गरेको छ। अघिल्लो धारणा अनुसार ती उपग्रहहरू मृत र जीवनको कुनै उपस्थिति नभएका ठानिए पनि नयाँ विश्लेषणले त्यो विचारलाई चुनौती दिएको छ।
सन् १९८६ मा नासाको अन्तरिक्षयान *भोएजर–२* ले अरुण ग्रह नजिक पुगेर तथ्यांक सङ्कलन गरेको थियो। तर, हालै गरिएको अध्ययनले त्यो समयमा शक्तिशाली सौर्य आँधीको प्रभाव रहेको र यसले अरुण ग्रहको चुम्बकीय क्षेत्र र वातावरणीय अवस्थामा अस्थायी परिवर्तन गरेको हुनसक्ने देखाएको छ।
युनिभर्सिटी कलेज लन्डनका वैज्ञानिक डा. विलियम डनले ४० वर्ष पुरानो धारणा गलत भएको बताउँदै, अरुण ग्रह र यसको प्रणाली जीवनका लागि अझ उत्साहजनक हुनसक्ने निष्कर्ष निकालेका छन्।
यी नयाँ निष्कर्षहरूलाई *नेचर एस्ट्रोनोमी* जर्नलमा प्रकाशित गरिएको छ, जसले जीवनका लागि आवश्यक परिस्थितिहरू अरुणको उपग्रहहरूको सतहभन्दा मुनि रहेको हुनसक्ने सम्भावना प्रस्तुत गरेको छ।
नासाले आउँदो दशकमा “यूरेनस अर्बिटर” र “प्रोब” अभियान अन्तर्गत अरुण ग्रहको विस्तृत अध्ययन गर्ने योजना बनाएको छ, जसले ग्रहका चन्द्रमाहरूमा पानीको सतह तल जीवनका लागि सम्भावनाहरू थप अन्वेषण गर्नेछ।
