यस्तो पनि

नेपोलियनले आत्महत्या प्रयास गरेका पेस्तोल लिलाम !

फ्रान्सका सम्राट् नेपोलिअन बोनापार्टको स्वामित्वमा भएका दुइटा पिस्तोल १६.९ लाख यूरो (झन्डै २४.५ करोड नेपाली रुपैयाँ) मा लिलाम भएका छन्। कुनै बेला ती हतियार प्रयोग गरेर उनले आत्महत्या गर्न खोजेको ठानिन्छ।

Patanjali Nepal
Sweet Mart Food

प्यारिसस्थित बन्दुक उत्पादक लुईमारिन गोसेमा बनेका ती पिस्तोल १२ लाखदेखि १५ लाख यूरोमा बिक्री हुने अपेक्षा राखिएको थियो। ओजनाट अक्शन हाउसमा ती पिस्तोलको लिलामी गरिएको थियो। उक्त लिलाम गृह नेपोलिअनले सन् १८१४ मा गद्दी परित्याग गरेपछि आत्महत्या गर्ने प्रयास गरेको फोँटेन्ब्लो दरबारनजिकै छ।

केही समयअघि फ्रान्सको संस्कृति मन्त्रालयले ती पिस्तोललाई राष्ट्रिय सम्पत्ति घोषणा गर्दै तिनलाई विदेश पठाउन रोक लगाउने निर्णय गरेको थियो। ती पिस्तोल अस्थायी रूपमा मात्र फ्रान्सबाट बाहिर लैजान पाइन्छ।

अब फ्रान्स सरकारले ती पिस्तोल किन्ने व्यक्तिसँग ३० महिनाभित्र ती हतियार सकार्न सक्छ। उनको नाम सार्वजनिक गरिएको छैन। ती दुवै पिस्तोलमा सुन र चाँदीका बुट्टा छन्। तिनमा नेपोलिअनको मुखाकृति पनि अङ्कन गरिएको छ।

आत्महत्याको प्रयास

विदेशी फौजसँग आफ्नो सेना पराजित भएपछि नेपोलिअन बोनापार्ट सत्ता त्याग्न बाध्य भएका थिए। त्यसपछि सन् १८१४ को एप्रिल १२ को राति नेपालिअनले ती पिस्तोल प्रयोग गर्न खोजेको बताइन्छ।

तर उनका वरिष्ठ सैन्य अधिकारी आर्मा ड कोलाँकूरले ती पिस्तोलबाट बारुद हटाइदिएका थिए। त्यसपछि नेपोलिअनले विष सेवन गरे। तर उनको मृत्यु भएन। पछि नेपोलिअनले ती पिस्तोल कोलाँकूरलाई दिए। ती हतियार कोलाँकूरको परिवारको स्वामित्वमा रहँदै आयो।

पिस्तोल राखिएको बाकस अनि बारुद राख्ने सिङ र बारुद खाँद्न प्रयोग गरिने छडीहरूसहित अन्य सामग्री पनि सँगै बिक्रीमा राखिएको थियो।

लिलामकर्ता जाँ‍ पिएर ओजनाटका अनुसार ती वस्तुसँगै नेपोलिअन सबैभन्दा नराम्रो अवस्थामा हुँदाको छवि पनि बिक्रीका लागि राखिएको थियो। नेपोलिअनसँग सम्बन्धित सामानमा धेरै रुचि देखिन्छ। गत नोभेम्बरमा नेपोलिअनको छविसँग जोडिएको टोपी १९ लाख यूरो (२७.४८ करोड रुपैयाँ)मा बिक्री भएको थियो। सन् २०१४ मा पनि नेपोलिअनको अर्को टोपी १९ लाख यूरोमै बिक्री भएको थियो।

नेपोलिअन फेरि सत्तामा
नेपोलिअन निर्वासित भएर भूमध्यसागरस्थित एल्बा टापुमा गए। त्यसपछि १८१५ मा त्यहाँबाट भागेर उनले फ्रान्सको राजधानीमा कुच गरे। तर उनी वाटरलूको युद्धमा पराजित भएपछि उनको छोटो कार्यकाल पनि टुङ्गियो।

दोस्रो पटक निर्वासित भएपछि सन् १८२१ को मे ५ मा उनको मृत्यु भयो। मृत्यु हुँदा उनी दक्षिण आन्ध्र महासागरस्थित सेन्ट हेलेना टापुमा ब्रिटिश कारागारमा थिए।

नेपोलिअनसँग सम्बन्धित महत्त्वपूर्ण घटनाक्रम

  • १७६९ – जन्म
  • १७८५ – प्यारिसस्थित सैन्य प्रतिष्ठानबाट दीक्षित
  • १७९५ – प्यारिसमा राजावादी विद्रोहीलाई परास्त गर्ने क्रान्तिकारी फौजको नेतृत्व
  • १७९६-१८०२ – अस्ट्रिया, प्रसिया र अरूसँग महत्त्वपूर्ण युद्धमा विजय
  • १८०४-०५ – आफूलाई सम्राट् घोषणा र अस्ट्रिया र रुसका फौजमाथि विजय
  • १८१२-१४ – रुसमा गरिएको कारबाही विफल भएपछि सैन्यफिर्ती; गद्दी परित्याग गर्न बाध्य र एल्बा टापुमा निर्वासित
  • १८१५ – एल्बाबाट भागेपछि ब्रिटिश र प्रसियाका सेनाबाट वाटरलूमा पराजित; सेन्ट हेलेना टापुमा निर्वासित
  • १८२१ – मृत्यु

सम्बन्धित समाचार :

Leave a Reply

Your email address will not be published. Required fields are marked *

Back to top button