हात्ती बिक्रीका लागि भारततर्फ लैजाँदै गरेको आरोपमा तीनजना पक्राउ परेका छन् । दुईवटा हात्तीलाई भारततर्फ लैजाँदै गरेको अवस्थामा उनीहरू पक्राउ परेका हुन् ।
दुई हात्तीलाई भारततर्फ लैजाँदै गरेको अवस्थामा पर्साको पकहामैनपुर गाउँपालिका–५, पोखरिया टोलमा फेला पारी उनीहरूलाई नियन्त्रणमा लिएको जिल्ला प्रहरी कार्यालय पर्साले जानकारी दिएको छ । इलाका प्रहरी कार्यालय पोखरियाबाट खटिएको टोलीले पक्राउ गरेको हो ।
पक्राउ पर्नेमा चितवनको भरतपुर महानगरपालिका जितपुर बस्ने अन्दाजी ६० वर्षीय बुद्धिराम महतो (माउते), सोही ठाउँ बस्ने अन्दाजी ४० वर्षीय राजु कुमाल (माउते) र पकहामैनपुर–५, सबैठवा बस्ने अन्दाजी ३५ वर्षीय सफरोज आलम (बिक्री–वितरण गर्ने) छन् ।
हात्तीसहित नियन्त्रणमा लिइएका उनीहरूलाई आवश्यक कारबाहीका लागि पर्सा राष्ट्रिय निकुञ्जमा बुझाइने जनाइएको छ ।
