पर्सा राष्ट्रिय निकुञ्जका पर्यटकीय स्थलहरूको प्रचारप्रसारका लागि निकुञ्जमा साइक्लिङ प्रतियोगिता आयोजना गरिएको छ ।
महाशिवरात्रि र नेपाली सेना दिवसको अवसरमा नेपाली सेनाले उक्त प्रतियोगिता आयोजना गरेको हो । प्रतियोगिताको वीरगञ्ज महानगरपालिकामा नगर प्रमुख विजयकुमार सरावगीले उद्घाटन गरेका थिए ।
बारा पर्साका प्रतियोगीहरूको सहभागिता रहेको प्रतियोगितामा साइक्लिङ गर्ने दूरी ३९ किलोमिटर रहेको नेपाली सेना सिद्धिबक्स गण आधाभारका मेजर कमानसिंह गुरुङले जानकारी दिए ।
प्रतियोगिता उद्घाटन गर्दै प्रमुख सरावगीले पर्यटनको नयाँ गन्तव्यको रूपमा रहेको पर्सा राष्ट्रिय निकुञ्जमा पर्यटकीय विकासमा महानगरपालिकाको निरन्तर साथ र सहयोग रहने बताए ।
पर्यटन प्रवर्द्धनका लागि स्थानीय, प्रदेश र संघ सरकारबीच सहकार्यको खाँचो समेत उनले औंल्याए । वीरगञ्ज क्षेत्रको सबैभन्दा नजिकको पर्यटकीयस्थल पर्सा राष्ट्रिय निकुञ्जलगायत आसपासका पर्यटकीय क्षेत्रहरूको विकास र प्रवर्द्धनमा उनले जोड दिए ।
नेपालको प्रमुख प्रवेशद्वार भएको वीरगञ्ज महानगरपालिकाले यसबाट फाइदा लिन सक्ने विश्वास उनले व्यक्त गरे ।
वीरगञ्ज भएर नेपाल भित्रिने पर्यटकलाई पर्सा निकुञ्जबारे पर्याप्त जानकारी गराउनुपर्ने र उनीहरूलाई कम्तीमा २ दिन वीरगञ्जका होटलमा राख्न सके होटल व्यवसायको प्रवर्द्धनमा पनि महत्त्वपूर्ण योगदान पुग्ने सरावगीले बताए ।
महानगरपालिकाले उक्त प्रतियोगिताका लागि ५ लाख रुपैयाँ सहयोग गरेको थियो । उद्घाटनमा मधेश प्रदेशका प्रदेशसभा सदस्य सुन्दर विश्वकर्मा, सीता गुरुङलगायत सहभागी थिए ।
