नेपाली कांग्रेसको १४औँ महाधिवेशन संस्थापन इतर पक्षमा सभापतिको साझा उम्मेदवार चयन गर्न सकस भएको छ ।
साझा उम्मेदवार चयन गर्न भन्दै बत्तीसपुतलीस्थित अनुपम फुडल्यान्डमा बसेको पौडेल पक्षको बैठक निष्कर्षविहिन टुंगिएको छ ।
सभापतिका आकांक्षीबिना बसेको बैठकले पनि साझा उम्मेदवार टुंग्याउन नसकेको हो । सवा १ बजे सकिएको बैठकमा नेताहरू चन्द्र भण्डारी, जीवन परियार र डा.रामशरण महत, जिल्ला सभापति, निवर्तमान जिल्ला सभापति, प्रदेश सभापति, प्रदेशमा उम्मेदवार बनेकाहरू र केन्द्रीय सदस्यहरू सहभागी थिए । तर उनीहरूबीच पनि साझा उम्मेदवार को हुने भन्नेमा एकमत नभएको एक नेताले बताए ।
बैठकले साझा उम्मेदवार नटुंग्याएपछि आज अपराह्न ३ बजे नेता प्रकाशमान सिंहको चाक्सीबारीस्थित निवासमा बैठक बस्ने गरी टुंगिएको छ । ३ बजेको बैठकमा सभापतिका आकांक्षी र केन्द्रीय सदस्यबीच छलफल हुने बताइएको छ ।
यसअघि बुधबार सिंहनिवासमा नै बसेको बैठकले सभापतिको साझा उम्मेदवार तय गर्ने निचोड निकालेको थियो थियो ।
बैठकमा सभापतिमध्येका एक आकांक्षी डा.शशांक कोइरालाले नेता पौडेलका लागि आफूले सभापतिमा गरेको दाबी छाड्ने बताएका थिए । तर, प्रकाशमान सिंह र डा.शेखर कोइराला भने आ–आफ्नो अडानबाट टसमस भएका छैनन् ।
