नेकपा माओवादी केन्द्रका नेता नारायणकाजी श्रेष्ठ सत्ता गठबन्धनका शीर्ष नेताप्रति असन्तुष्ट देखिएका छन् । उनले आफ्नो असन्तुष्टि शुक्रबार ट्वीटरमार्फत पोखेका छन् ।
मन्त्री बन्ने तिब्र चाहाना राखे पनि उनलाई मन्त्री नबनाइएपछि उनी माओवादी केन्द्रका अध्यक्ष पुष्पकमल दाहालसँग पनि असन्तुष्ट छन् । असन्तुष्टिकै कारण पार्टीको प्रवक्ताबाट राजीनामा दिएर बसेका श्रेष्ठले सत्ता गठबन्धनका शीर्ष नेताहरुकोमात्र बैठक बसेर निर्णय लिने गरिएको भन्दै आसन्तुष्टि पोखेका छन् ।
उनले प्रतिनिधिसभा अदालतले पुनःस्थापना गरेपछि र देउवा सरकार गठन भएपछि पाँच दलीय गठबन्धन अहिले शीर्ष नेताको गठबन्धनमा परिणत भएको भन्दै आक्रोश पोखेका छन् ।
उनले देउवा नेतृत्वको सरकार बनेपछि उच्च स्तरीय राजनीतिक संयन्त्र गठन गर्ने निर्णय भए पनि सो गठन हुन नसकेकोमा आक्रोश पोखेका छन् । उनले अहिले निर्णयहरु साँघुरो घेराबाट हुन थालेकोसमेत टिप्पणी गरेका छन् ।
देउवा सरकार बन्नुअघि निकै सक्रिया देखिएका श्रेष्ठ पछिल्ला दिनहरुमा गुमनाम भएका छन् । सत्ता सञ्चालनमा पनि उनको कुनै भूमिका छैन । त्यसैले पनि उनी असन्तुष्ट बनेका हुन् ।
एमसीसीबारे पनि श्रेष्ठले पार्टीको धारणा भन्दै अहिलेकै अवस्थामा पारित हुन नसक्ने बताएका छन् ।
