एमसीसीबारे प्रचण्डको फरक दाबी-पारित गर्ने पत्र लेखेको छैन
नेकपा माओवादी केन्द्रका अध्यक्ष तथा सत्ता गठबन्धनका शीर्ष नेता पुष्पकमल दाहाल प्रचण्डले अमेरिकी सहयोग नियोग मिलेनियम च्यालेन्ज कर्पोरेशन (एमसीसी) पारित गर्ने भनेर आफूहरुले पत्र नपठाएको बताएका छन् ।
प्रधानमन्त्री शेबहादुर देउवाले बिहीबार एमसीसी पारित गर्न प्रचण्ड र आफूले हस्ताक्षर गरेर पत्र पठाइसकेको बताएका थिए । देउवाको यो भनाइपछि सत्ता गठबन्धनमा तरंग आएको थियो ।शुक्रबार प्रचण्डले देउवाले भने जस्तो आफूहरुले पारित गर्ने भनी पत्र नलेखेको दाबी गरे । पत्रकारहरुसँग कुरा गर्दै प्रचण्डले राष्ट्रिय सहमति नभई पारित गर्न नसकिने भएकाले समय मागेर पत्र पठाइएको प्रष्टीकरण दिए । उनले पत्रमा पारित गर्न कहाँ समस्या छन् ती समाधान गरेरमात्र अगाडि बढ्ने उल्लेख गरिएको बताएका छन् ।
प्रचण्डले एमसीसीमा हस्ताक्षर गर्दा संसदबाट अनुमोदन गर्ने सर्त नरहेको तर अहिले थपिँदा समस्या भएको बताए ।
उनले अमेरिकाले अनुदान दिने र नेपालले लिने स्वभाविक भएकाले सम्झौतामा हस्ताक्षर भएको बताए । तर, अहिले संसदबाट अनुमोदन गरेर ऐनको हैसियत दिन खोजिएपछि रहस्य के हो ? भन्ने परेको बताए ।
