नेपाली युवा उद्यमी मञ्च (एनवाईईएफ) वीरगञ्जको आयोजनामा आज वीरगञ्जमा युवा महिला उद्यमी सम्मेलन हुँदैछ । बिहान ११ बजे होटल भिसुवामा शुरु हुने सम्मेलनमा १ सय भन्दा बढी महिला उद्यमीहरु सहभागी हुने आयोजकले बताएको छ ।
सम्मेलनको उद्घाटन प्रदेश २ का उर्जा तथा खानेपानी विकास मन्त्री ओमप्रकाश शर्माबाट हुने आयोजकले जानकारी दिएको छ । मोफसलमै पहिलो पटक वीरगञ्जमा हुन गइरहेको महिला उद्यमी सम्मेलनबाट महिला उद्यमशीलता प्रवद्र्धनमा महत्वपूर्ण सहयोग पुग्ने विश्वास एनवाईईएफ वीरगञ्जका अध्यक्ष अनुप अग्रवालको छ ।
नेपालको उद्यम व्यापारका क्षेत्रमा महिलाहरूको सहभागिता निकै न्यून रहेको परिप्रेक्षमा यो सम्मेलनबाट महिलाहरूलाई उद्यामशीलतामा अघि बढ्न प्रोत्साहन प्राप्त हुने सम्मेलन संयोजक मनीषा सुनुवारले बताइन् ।
सम्मेलनमा विभिन्न सफल उद्यमीका अनुभव तथा संघर्ष, स्टार्टअप उद्यमीका अनुभव, उत्पादन, बजार पहिचान, प्रवद्र्धन, प्रोत्साहनका उपाय, महिला उद्यमका समस्या, चुनौती र अवसरलगायतका पक्षमा बेग्लाबेग्लै सत्रमा अन्तरक्रिया हुने छन् ।
उद्यमशीलताका विविध क्षेत्रहरूमा सहभागी महिला उद्यमीहरूको अनुभव आदानप्रदानबाट उद्यम व्यवासयका क्रममा देखा पर्ने समस्यालाई अवसरको रुपमा रुपान्तरण गर्ने क्षमता विकास हुने आयोजकको भनाइ छ ।
सम्मेलनका सहभागीले उद्यमका लागि उपयोगी ज्ञान, शिप, तथा क्षमता अभिवृद्धिका दृष्टिले लाभ लिन सक्ने छन् ।
उद्यमका क्षेत्रमा सफल महिला उद्यमीका संघर्ष र धैर्यताका अनुभव नयाँ उद्यमीका लागि उद्यमयात्राका क्रममा सन्दर्भ सामग्री बन्न सक्ने र स्टार्टअपका समस्या आगामी दिनमा चाल्नुपर्ने कदम र त्यसको प्रस्थानबिन्दु बन्न सक्ने बताइएको छ ।
