भारतबाट यो साता १० लाख डोज ‘कोभिसिल्ड’ खोप भित्रिने, दशैंअघि ३५ प्रतिशतलाई खोप
दशैं अघिनै भारतबाट १० लाख डोज खोप नोपल आउने भएको छ । भारतको सिरम ईन्स्टिच्यूटमार्फत कोभिसिल्डको १० लाख मात्रा खोप यो हप्ताभित्रै आउने स्वास्थ्य तथा जनसंख्या मन्त्रालयले जनाएको छ ।
नेपाल सरकारले भारतसँग खरिद गरेको २० लाख डोजको पूरक खोप नेपाल ल्याउन लागिएको हो । यसअघिनै आयात गर्नुपर्ने कोभिसिल्ड भारतमामै कोरोना संक्रमितको संख्या बढ्न थालेपछि नेपाललाई खोप दिएको थिएन ।
नेपालमा कोरोना भाइरस रोकथामका लागि नेपालमा चीनबाट आयातित भेरोसेल, भारतीय खोप कोभिसिल्ड र अमेरिकन खोप जोनसन एण्ड जोनसन प्रयोगमा ल्याइएको छ ।
स्वास्थ्य तथा जनसंख्या राज्यमन्त्री उमेश श्रेष्ठले दशैंअघि ३५ प्रतिशत जनसंख्यालाई कोभिडविरुद्धको खोप लगाइसक्ने बताएका छन् ।
मन्त्री श्रेष्ठले सरकारको पहिलो प्राथमिकता खोप रहेको उल्लेख गर्दै यो वर्षको अन्त्यसम्म सबै जनतालाई खोप उपलब्ध गराइसक्ने जानकारी दिए ।
उनका अनुसार उपत्यकामा ७५ प्रतिशत जनसंख्याले कोभिडविरुद्धको खोप लगाइसकेको छ । मन्त्री श्रेष्ठका अनुसार हालसम्म १ करोड ४१ लाख मात्रा खोप उपलब्त्र गराइसकिएको र दशैंसम्ममा १ करोड ६० लाख मात्रा खोप उपलब्ध गराउने योजना रहेको छ ।
मन्त्री श्रेष्ठले १४ हिमाली जिल्लाका सबै नागरिकलाई खोप लगाउने काम शुरू गरिएको जिकिर गर्दै तीन महिनाभित्र हिमाली जिल्लामा खोप लगाइसक्ने बताए । उनले दशैंलगत्तै १८ वर्षमुनिका बालबालिकाका लागि कोरोनाविरुद्धको खोप लगाउन शुरु गरिने जानकारी दिँदै त्यसका लागि १ करोड खोप आउने सुनिश्चित भइसकेको बताए ।
