काठमाडौ– प्रमुख प्रतिपक्षी दल नेकपा एमालेले लागतार संसद् अवरोध गरेपछि सो विषयमा छलफल गर्न सोमबार सभामुख अग्नि सापकोटाले बोलाएको सर्वदलीय बैठक बिनानिस्कर्ष सकिएको छ ।
एमाले नै बैठकमा अनुपस्थित भएपछि कुनै निस्कर्ष नआएको बैठकमा सहभागी राष्ट्रिय जनमोर्चाकी उपाध्यक्ष दुर्गा पौडेलले जानकारी दिइन् ।
जोसँग सम्बन्धित विषय हो उही बैठकमा नाआएपछि कुनै निस्कर्ष नआएको उनले बताइन् । उनका अनुसार दलहरुले एमालेसँग संवाद गरेर फेरि सर्वदलीय बोलाउन दलहरुले सभामुखलाई सुझाव दिएका छन् ।
दलहरुले एमालेसँग सम्वाद गर्न सुझाव दिएपछि सोमबार बिहान पनि एमाले नेताहरुसँग आफूले कुरा गरेको तर सफल नभएको सभामुख सापकोटाले बैठकमा जानकारी गराएका थिए ।
सोमबार बिहान सभामुख सापकोटाले एमाले प्रमुख सचेतक विशाल भट्टराईसँग कुरा गरेका थिए । तर, एमालेले आफूले कारबाही गरेका १४ जना सांसदलाई पदमुक्तको सूचना टास गर्नुपर्ने वा राजीनामा दिनुपर्ने सर्त राखेको थियो ।
सर्वदलीय बैठकमा कानूनमन्त्री ज्ञानेन्द्रबहादुर कार्कीले सोमबार बिहान आफूले एमाले संसदीय दलका उपनेता सुवास नेम्वाङसँग कुरा गरेको जानकारी गराएका थिए ।
एमाले विभाजनमा सभामुख सापकोटाको भूमिका रहेको भन्दै एमालेले संसद अवरोध गर्दै आएको छ । एमालेले माधवकुमार नेपालसहित १४ जना सांसदलाई कारबाही गरेको जानकारी संसद सचिवालयमा भदौ १ गते दिएको थियो ।
सभामुख सापकोटाले सो विषयमा अध्ययन भइरहेको भनिरहँदा भदौ ९ मा माधवकुमार नेपालको अगुवाइमा एमाले विभाजन गरेर नेकपा (एकीकृत समाजवादी)ले वैधता पाएको थियो । यही विषयलाई लिएर एमालेले सर्वोच्चमासमेत रिट दायर गरेको छ ।
