वीरगञ्ज-नेपाली कांग्रेस पर्साका उपसभापति प्रकाशकुमार उपाध्यायले नेपाल–भारत सीमा नाकाबाट सर्वसाधारणको आवागमनलाई सहज तुल्याउन सरकारको ध्यानाकर्षण गराएका छन् ।
सरकारले कोरोना महामारी नियन्त्रणका लागि भन्दै १३ ओटा नाकाबाट स्वास्थ्य सतर्कताका मापदण्ड पालना गरेर नेपालीहरु प्रवेश गर्न पाउने निर्णय गरेको थियो । तर, सवारी साधनको आवागमनमा अझै रोक लगाइएको छ ।
सरकारले नाकाबाट सर्वसाधारणको आवगामनलाई सहज नबनाउँदा सर्वसाधारणले सास्ती पाउनुका साथै सरकारी नीतिकै कारण कोरोना संक्रमणको जोखिम झन बढेको नेता उपाध्यायले बताएका हुन् ।
निषेधाज्ञा खुकुलो भइसकेको र सिमानाबाट आवागमनसमेत निवाभइरहेकाले औपचारिक रुपमै आवागमन व्यवस्थित गरिनुपर्ने उपसभापति उनले बताए ।
‘सिमानाबाट मानिसको आवगामनमा कुनै रोकटोक छैन । स्वास्थ्य मापदण्ड र सतर्कतामा पनि ध्यान दिइएको छैन,’ उपाध्यायले सञ्चारकर्मीहरुसित भने, ‘तर, सवारी साधनको आउजाउमा रोक लगाउँदा सर्वसाधारण पैदल हिँडेर सिमाना आरपार गर्न बाध्य छन् । यसले कोरोना संक्रमण फैलिने जोखिम झन् बढेको छ ।’
बरू पैदल आवागमनले भिडभाड बढ्दा संक्रमणको सम्भावना बढी हुने नेता उपाध्याय बताउँछन् । ‘गाडीमा आउन रोकिएको छ । तर, पैदल हिड्नलाई कुनै सोधपुछ पनि छैन । गाडीमा आउनेले कोरोना ल्याउने र पैदल हिड्नेले नल्याउने त होइन नि,’ उनको तर्क छ ।
अहिले भारतले आफ्ना नागरिकहरुलाई खोप दिने अभियानलाई तीव्र पारेको र नेपाल सरकारले समेत खोप दिइरहेकाले सीमावर्ती क्षेत्रमा संक्रमणको जोखिम तुलनात्मक कम भएको भनाइ उपाध्यायको छ । ‘भारतबाट पैदल आउँदा कोरोना नआउने, तर गाडीमा भरिएर आउने हो र ? कि कोरोना गाडी चढेर आउने हो ? बरु गाडीमा आउँदा संक्रमणको जोखिम तुलनात्मक निकै कम हुन्छ,’ उनले भने ।
सरकारले भारतीय निजी सवारी साधनलाई आवतजावतमा रोक लगाएको छ । सीमाक्षेत्रमा स्वास्थ्य सतर्कताका उपायहरुलाई प्रभावकारी बनाएर आर्थिक र सामाजिक दैनिकीलाई सहज बनाइनुपर्ने सुझाव नेता उपाध्यायको छ ।
‘नेपाल र भारतबीच खुला सिमाना छ । यहाँ सामाजिक र सांस्कृतिक सम्बन्ध पनि छ । कोरोना संक्रमणको लहर र यसको जोखिम उच्च भएको अवस्थामा गरिएको निर्णय कायम राख्दा सीमाञ्चलको जनजीवन समस्यामा परेको छ,’ उपाध्यायले भने, ‘हामीकहाँ निषेधाज्ञा अब नाममात्रको भएको अवस्थामा सिमा नाकाबाट आवागमन असहज बनाइराख्नुको औचित्य छैन ।’
