वीरगञ्ज-वीरगञ्जका होटल तथा पर्यटन व्यवसायीले लामो प्रयासपछि कोरोनाको खोप लगाउन पाएका छन् ।
मंगलबार होटल तथा पर्यटन व्यवसायी र त्यहाँ कार्यरत कामदार कर्मचारीले कोरोनाको पहिलो डोज लगाएको होटल तथा पर्यटन व्यवसायी संघ वीरगञ्जले बताएको छ ।
होटल र पर्यटन व्यवसायी र कामदार कर्मचारी गरी ४५० जनाले खोपको पहिलो मात्रा लगाएको जानकारी होटल तथा पर्यटन व्यवसायी संघ वीरगञ्जका अध्यक्ष हरि पन्तले दिए ।
भारतसित खुला रुपमा सिमाना जोडिएको वीरगञ्जको होटल र पर्यटन व्यवसाय कोरोना संक्रमणको सम्भावनाको दृष्टिले पनि उच्च जोखिमा थियो । यही जोखिमलाई ध्यानमा राखी खोपमा प्राथमिकता दिइनुपर्ने माग व्यवसायीहरुले गरेका थिए ।
संघले लामो समयदेखि खोप उपलब्ध गराउन माग गर्दै आएको थियो । सरोकारका निकायहरुको सहयोग र सहजीकरणमा खोप उपलब्ध भएको अध्यक्ष पन्तले बताए ।
