No Image Headlineदेश

एकताका लागि प्रयास गर्न एमाले स्थायी कमिटी बैठक स्थगित

काठमाडौँ– एकताको लागि थप पहल गर्न भन्दै पार्टी अध्यक्ष केपी ओलीले बोलाएको नेकपा एमालेको स्थायी कमिटी बैठक स्थगित भएको छ । बैठक आइतबारसम्मका लागि स्थगित भएको छ ।

शनिबारको बैठकमा नेता सुवास नेम्वाङले पार्टी एकताका बारेमा भइरहेका प्रयासका बारेमा बैठकलाई जानकारी गराएपछि आइतबार दिउँसो ३ बजेसम्मका लागि स्थगित भएको हो ।

बैठकपछि नेता नेम्वाङले अरु कुनै पनि एजेण्डामाथि छलफल नभएको जानकारी दिए । उनले पार्टी एकता जोगाउनका लागि शनिबार समेत विघटित कार्य दलमा रहेका स्थायी कमिटी सदस्यहरुका बीचमा छलफल भएको र पार्टी एकता जोगाउन निरन्तर छलफल गरिरहेको बताए ।

शनिबार बिहान सिंहदरबारमा कार्यदलमा रहेका स्थायी कमिटी सदस्यहरुको बैठक बसेको थियो । त्यसपछि उपाध्यक्ष भीम रावलले वरिष्ठ नेता माधवकुमार नेपालसँग छलफल गरेको नेता नेम्वाङले जानकारी दिए ।

पार्टीलाई एकताबद्ध गर्न निरन्तर छलफल गरिरहेको भन्दै उनले भने, ‘भीम रावल लगायतका नेताहरु माधवकुमार नेपालसँग कुरा गर्नका लागि त्यता लाग्नुभएको छ । अहिले पनि नथाकिकन पार्टीलाई एकताबद्ध बनाउन लागिरहेका छौँ ।’

यसअघि आजै बिहान मात्रै एमालेले बनाएको कार्यदलमा रहेका स्थायी कमिटी सदस्यहरुबीच छलफल भएको थियो ।

 

Related Articles

Leave a Reply

Your email address will not be published.

Back to top button