स्वास्थ्यका लागि बदाम: स्वाद र फाइदाको संयोजन
चिया पिउँदै गर्दा कुरकुरे खाने मन लाग्ने धेरैको बानी हुन्छ। यस्तो बेलामा बदाम खानु कुनै खजाना भन्दा कम हुँदैन। सडकका कुनादेखि घरको आँगनसम्म बदामको मोह सबैमा देखिन्छ। यसको स्वाद, सुगन्ध र कुरकुरेपनले सबैलाई लोभ्याउने गर्छ।
तर, बदाम केवल स्वादकै लागि नभई स्वास्थ्यका दृष्टिकोणले पनि निकै महत्वपूर्ण मानिन्छ। पोषणविद्हरूका अनुसार बदाममा रोग प्रतिरोधात्मक क्षमता बढाउने र मुटु स्वास्थ्य सुधार गर्ने गुण हुन्छन्। यसैले दैनिक आहारमा बदामलाई समावेश गर्न चिकित्सकहरूले समेत सुझाव दिने गरेका छन्।
विशेषज्ञहरू भन्छन्, साँझको खाजामा समोसा, पकौडा वा चिप्सको सट्टा भुटेको बदाम उपयुक्त विकल्प हुन सक्छ। भुटेर हल्का नुन हालिएको बदाम स्वादिलो मात्र नभई स्वस्थकर पनि हुन्छ।
त्यसैगरी, दक्षिण एशियामा लोकप्रिय बदाम चटनीले इडली, दोसा वा चपातीमा विशेष स्वाद थप्ने गर्छ। दही, लसुन, खुर्सानी र भुटेको बदामको संयोजनले यो चटनी अझ स्वादिष्ट बनाउँछ।
स्वास्थ्यप्रेमीहरूका लागि बदाम र गुड़ (चाकु) का लड्डू पनि उत्तिकै लाभदायक हुन्छन्। फलाम र प्रोटिनले भरिपूर्ण यी लड्डूले शरीरलाई न्यानो राख्न मद्दत गर्छन्।
पछिल्लो समय पिनट बटर लोकप्रिय बन्दै गइरहे पनि घरमै तयार गर्न सकिने बदाम बटर पनि उत्तिकै स्वादिलो र स्वस्थ विकल्प हो। यो विशेषगरी बालबालिकाहरूका लागि उपयुक्त खाजा बन्न सक्छ।
यद्यपि, पोषणविद्हरूले अत्यधिक मात्रामा बदाम खानु उपयुक्त नरहने बताएका छन्। धेरै बदामले पाचन समस्या उत्पन्न गर्न सक्छ भने नट एलर्जी हुनेहरूका लागि यसबाट बच्न सल्लाह दिइएको छ।
स्वाद र स्वास्थ्यको अद्भुत संयोजन बदामले दिन सक्ने भएकाले यसलाई नियमित आहारमा समावेश गर्न विज्ञहरू सुझाव दिन्छन्। बदाम केवल नाश्ता होइन, शरीरका लागि स्वादिलो उपहार पनि हो। (एजेन्सीको सहयोगमा)
