ट्रम्प–मस्क सम्बन्धमा दरारः खर्च विधेयकपछि आरोप–प्रत्यारोप
केही समयअघिसम्म निकट सम्बन्धमा देखिएका अमेरिकी पूर्वराष्ट्रपति डोनाल्ड ट्रम्प र टेस्ला तथा एक्स (पूर्व ट्विटर) का मालिक एलन मस्कबीचको सम्बन्ध अहिले विवाद र आरोप–प्रत्यारोपमा परिणत भएको छ।
पछिल्लो केही दिनयता एलन मस्कले ट्रम्प प्रशासनको खर्च सम्बन्धी ऐनप्रति सामाजिक सञ्जालमार्फत् कडा आलोचना गर्दै आएका छन्। यसले दुईबीचको सम्बन्धमा चिसोपना ल्याएको बताइएको छ।
बिहीबार जर्मन चान्सलरसँग ओभल अफिसमा भेटघाटका क्रममा ट्रम्पले मस्कप्रति आफू ‘धेरै नै निराश’ भएको बताए। मस्कले सामाजिक सञ्जालमा निरन्तर ट्रम्पको आलोचना गरेपछि ट्रम्पले यस्तो प्रतिक्रिया जनाएका हुन्।
विवाद चर्कँदै गएपछि ट्रम्पले मस्कलाई सामाजिक सञ्जालमै ‘पागल’ को संज्ञा दिएका छन्। त्यतिमात्र होइन, ट्रम्पले मस्क र कुख्यात यौन अपराधी जियफ्री एप्सटनबीचको सम्बन्धबारे पनि प्रश्न उठाउँदै त्यससम्बन्धी फाइल सार्वजनिक गर्नेसम्मको चेतावनी दिएका छन्।
एक साता अघिसम्म सुमधुर देखिएको सम्बन्ध मस्कले ट्रम्पको खर्च विधेयकबारे टिप्पणी गरेपछि बिग्रिएको हो। उक्त विधेयकको आलोचनापछि मस्क र ट्रम्पबीचको सम्बन्ध आक्रोशमा परिणत भएको छ।
यसबीच मस्कले सामाजिक सञ्जाल ‘एक्स’ मा नयाँ राजनीतिक दल गठनको आवश्यकता सम्बन्धी बहस सुरु गरेका छन्। मस्कले अमेरिकाको ८० प्रतिशत मध्यम वर्गको प्रतिनिधित्व गर्ने नयाँ दलको आवश्यकता रहेको तर्क गरेका छन्। यस विषयमा गरिएको अनलाइन बहसमा २० लाखभन्दा बढी प्रयोगकर्ताको सहभागिता देखिएको छ, जसमध्ये ८१.९ प्रतिशतले नयाँ दल आवश्यक रहेकोमा सहमति जनाएका छन्।
ट्रम्प–मस्क विवादको भविष्य अब कुन मोड लिन्छ भन्ने विषयले अमेरिकी राजनीतिमा नयाँ बहस सुरु गराएको छ।
