वीरगञ्जको आईसीपी भन्सारमा तस्करको रजगज, मूल नाकाबाटै तस्करीको खुलासा

वीरगञ्जको आईसीपी भन्सारमा तस्करहरुले कतिसम्म रजगज चलाएका रहेछन् भन्ने कुराको एउटा गतिलो प्रमाण बाहिरिएको छ । भन्सार कर्मचारीहरुकै संरक्षणमा मौलाइको तस्करी धन्धाको बेलाबेलामा पोल खुल्ने गरेको छ ।

वीरगञ्जको एउटा विवादास्पद व्यापारिक फर्मले भन्सारबाट जाँचपास गराएको जीराको पुनः परीक्षण हुँदा घोषणाभन्दा बढी परिमाण फेला परेपछि आईसीपीबाटै हुने संस्थागत तस्करीको पर्दा खुलेको हो ।

आरएन इन्टरप्राइजेज नामको एउटा व्यापारिक फर्मले परिमाण छलेर लैजान लागेको जीरामा भन्सारले जरीवाना तिराएको छ । सो फर्मले भारतबाट भित्र्याएको जीराको गाडीमा घोषणा गरिएभन्दा ४ हजार २ सय किलो जीरा भेटिएको हो । सो फर्मले भरेका २ ओटा प्रज्ञापनमध्ये एउटाको घोषणामा यस्तो गडबडी फेला परेको हो ।

दुई ओटामध्ये एउटामा ३०० र अर्कोमा ५४० बोरा उल्लेख गरिएको थियो । दोस्रो प्रज्ञापनको परीक्षण गर्दा ७०० बोरा फेला परेको हो । ती आयातकर्ताले भने बील समावेश गर्न छुटेकाले परिमाण फरक परेको दाबी गरेका छन् ।

सो फर्मले घोषणा गरेरै ल्याएको भए १४० बोरा जीरामा ३ लाख १३ हजार ६१४ रुपैयाँ भन्सार राजस्व तिनुपर्ने थियो । तर, यो रकम छल्न खोज्दा उनलाई भन्सारले ७० लाख ३९ हजार ९१४ रुपैयाँ जरीवाना तिराएको छ । आरएन इन्टरप्राइजेजलाई परिमाण छलेर लैजान खोजेको जीरा समातेर आईसीपी भन्सारले शनिबार सो जरीवाना जरीवाना तिराएको छ ।

परिमाण ढाँटेर जाँचपास गरी बाहिरिन लागेको गाडीमा घोषणभन्दा बढी जीरा भएको आशंकामा भन्सारका जाँचकीले गेटबाट फर्काएर पुनः परीक्षण गराएका थिए । बैशाख ४ गते पुनः जाँच हुँदा जरीवाना तिर्नुपर्ने भएको हो ।

भन्सारको स्वाचालित प्रणालीबाट पहेलो लेनमा जाँचपास भएको सो गाडीमा घोषणाभन्दा बढी परिमाण भेटिएको हो । पहेलो लेनमा चुहावटको मध्यम जोखिमका बस्तुहरु पर्छन् । यसमा कागजपत्रको मात्र जाँच हुन्छ । भन्सार स्रोतका अनुसार यो गाडीको लफडा मिलाउन भन्सार अधिकारीहरुलाई ती व्यापारीले ठूलै रकम अफर गरेका थिए । तर, यो प्रकरणको चर्चा भन्सार विभाग हुँदै अर्थ मन्त्रालयसम्म पुगेपछि कर्मचारी हच्किएको दाबी गरिएको छ ।

सीमाक्षेत्रबाट हुने तस्करी नियन्त्रणमा लागि सरकारले सिमानामा सशस्त्र प्रहरी खटाएको छ । नेपाल प्रहरीले पनि यसमा निगरानीको जिम्मा पाएको छ । तर, भन्सारबाटै यसरी भइरहेको संस्थागत तस्करी कायमै रहेसम्म राजस्वमाथिको चोरीचकारी बन्द नहुने दाबी सरोकारका पक्षको छ ।

आईसीपी भन्सारमा यस्ता घपलाहरु बाक्लै हुने गरेको र वाह्य दबाबका कारण सेटिङमा जान नसकेपछि जरीवान तिराउने गरिएको भन्सारका एक उच्च अधिकारीले बताएका छन् । तर आईसीपी भन्सारका प्रमुख भन्सार प्रशासक दीपक लामिछानेले यस्ता घटनामा निर्मम भएर कारवाही गरिरहेको बताए । पछिल्लो समयमा लेनको दुरुपयोग र परिमाण नै फरक पारेर सामान लैजाने प्रवृत्ति बढेपछि दैनिकजसो पुनः परीक्षणलाई तीव्र पारिएको उनको भनाइ छ । भन्सारले सेम्पलको रुपमा गाडी ल्याएर यस्तो परीक्षण गर्दै आएको छ ।