गढीमाई पञ्चवर्षीय मेला शुरू, बलिदान कहिले ?
बारा जिल्लाको महागढीमाई नगरपालिका–२ स्थित गढीमाई मन्दिरमा प्रसिद्ध पञ्चवर्षीय मेला शनिवारदेखि विधिवत रूपमा शुरू भएको छ। मेला प्रत्येक पाँच वर्षमा मङ्सिरको पहिलो दिनदेखि एक महीनासम्म लाग्ने परम्परा रहेको छ।
गढीमाई मेला पशुबलिका लागि विश्वभर चर्चित छ, जसका कारण नेपाल, भारत, बङ्गलादेश, भुटानलगायत विभिन्न देशबाट लाखौं भक्तजनहरूको भीड लाग्ने गर्छ। भक्तजनहरूले मेला अवधिभर गढीमाईको दर्शन, पूजा र भाकलअनुसार विभिन्न पशुहरूको बलि दिने प्रथा रहेको छ।
यस वर्ष मङ्सिर २३ गते राँगाको बलि दिने र मङ्सिर २४ गते बोकालगायत अन्य पशुपक्षीहरूको बलिको मिति तोकिएको गढीमाई मेला व्यवस्थापन समितिले जनाएको छ। महासचिव वीरेन्द्र प्रसादका अनुसार मेलाको औपचारिक सुरूवातसँगै बिहानैदेखि मन्दिरमा दर्शन र पूजाका लागि भक्तजनहरूको उल्लेखनीय उपस्थित रहेको छ।
व्यवस्थापनका विशेष पहलहरू
मेलालाई व्यवस्थित बनाउन व्यवस्थापन समितिले घुम्ती शौचालय, अस्थायी शौचालय, स्वास्थ्य शिविर, एम्बुलेन्स, वारुण यन्त्र, पिउने पानी, र बासको विशेष व्यवस्था गरेको छ। बरियारपुर क्षेत्रमा धर्मशाला निर्माण गर्नुका साथै स्थानीय बासिन्दाले घरघरमा भक्तजनहरूको बसोबासको प्रबन्ध मिलाएका छन्।
दशैं पर्वदेखि नै विभिन्न स्थानबाट भक्तजनहरू आउने क्रम जारी रहेको र मेलामा यस वर्ष थप उत्साह देखिएको महासचिव प्रसादले बताए। भक्तजनहरूको सहजताका लागि आवश्यक सबै सेवा–सुविधा प्रदान गर्ने प्रयास गरिएको पनि उनले जानकारी दिए।
गढीमाई मेलाको यो धार्मिक तथा सांस्कृतिक महत्त्वले केवल नेपालमै नभई अन्तर्राष्ट्रिय स्तरमा समेत गहिरो प्रभाव पार्ने गरेको छ।
