आजको मौसम : देशभरको मौसममा आंशिक बदली र हल्का वर्षाको सम्भावना
जल तथा मौसम विज्ञान विभाग, मौसम पूर्वानुमान महाशाखाले देशका विभिन्न क्षेत्रमा पश्चिमी वायुको प्रभाव रहेको जनाएको छ। लुम्बिनी, सुदूरपश्चिम, कर्णाली, र गण्डकी प्रदेशमा पश्चिमी वायुको सामान्य प्रभाव देखिएको छ भने कोशी, मधेश, र बागमती प्रदेशमा आंशिक प्रभाव रहेको छ। साथै, स्थानीय वायुको पनि आंशिक प्रभाव रहेको जानकारी दिइएको छ।
महाशाखाका अनुसार हाल कोशी, मधेश, बागमती, र गण्डकी प्रदेशसहित देशका पहाडी भूभागमा आंशिक बदली रहेको छ भने अन्य भूभागमा मौसम मुख्यतया सफा छ।
आज दिउँसो कोशी, बागमती, र गण्डकी प्रदेशका पहाडी भूभागमा आंशिकदेखि साधारणतया बदली रहनेछ भने बाँकी भूभागमा मौसम मुख्यतया सफा रहनेछ। यसैगरी, कोशी, बागमती, र गण्डकी प्रदेशका पहाडी भूभागका थोरै स्थानमा र अन्य प्रदेशका पहाडी भूभागका एकदुई स्थानमा मेघगर्जन र चट्याङ्गसहित हल्का वर्षाको सम्भावना रहेको छ।
रातिको मौसमसम्बन्धी पूर्वानुमानमा पनि कोशी, बागमती, र गण्डकी प्रदेशका पहाडी भूभागमा आंशिकदेखि साधारणतया बदली रहने र अन्य भूभागमा मौसम मुख्यतया सफा रहने जनाइएको छ। साथै, कोशी र गण्डकी प्रदेशका पहाडी भूभागका केही स्थानमा मेघगर्जन र चट्याङ्गसहित हल्का वर्षा हुने सम्भावना रहेको छ।
आज सूर्योदय बिहान ६ बजेर ३ मिनेटमा भएको थियो भने सूर्यास्त साँझ ५ बजेर ३६ मिनेटमा हुनेछ।
