होटल तथा पर्यटन व्यवसायी संघ वीरगञ्जले नेपाल पत्रकार महासंघका संघ, प्रदेश, र जिल्ला तहमा निर्वाचित पदाधिकारीहरूको सम्मानमा विशेष स्वागत तथा शुभकामना कार्यक्रम आयोजना गरेको छ।
संघका अध्यक्ष हरि पन्तको अध्यक्षतामा आयोजित कार्यक्रमका प्रमुख अतिथि पर्साका प्रमुख जिल्ला अधिकारी गणेश अर्यालले स्थानीय प्रशासन पर्यटन व्यवसायको सहजीकरणमा प्रतिबद्ध रहेको बताए। “पर्यटन प्रवर्द्धनमा सहजीकरणका लागि प्रशासन तत्पर छ,” उनले भने, “हामी पर्यटन विकासलाई प्राथमिकता दिन्छौं।”
कार्यक्रमका सहभागीले भारतीय पर्यटकहरूले सीमावर्ती क्षेत्रमा मैत्रीपूर्ण वातावरणको कमी महसुस गरिरहेको बताएका छन्। उनीहरूका अनुसार प्रमुख नाकाबाट नेपाल प्रवेश गर्ने भारतीय पर्यटकले दुर्व्यवहार सामना गर्नुपरेको छ, जसले नेपालको पर्यटन क्षेत्रको छविमा नकारात्मक प्रभाव परेको छ।
नेपाल पत्रकार महासंघका लेखा समिति संयोजक केसी लामिछाने, मधेश प्रदेशका अध्यक्ष श्याम बन्जारा, पूर्वसचिव दीपेन्द्र चौहान, र पर्सा शाखा उपाध्यक्ष निलिमा पौडेलले पर्यटन विकासका लागि सरकार, व्यवसायी, र सञ्चारमाध्यमबीच सहकार्यको आवश्यकता औंल्याए।
नेपाल पत्रकार महासंघ पर्साका अध्यक्ष ओमप्रकाश खनालले मधेशको पर्यटन भारतीय पर्यटकको आगमनमा निर्भर रहेको उल्लेख गर्दै पर्यटन प्रवर्द्धनको योजना भारतलाई केन्द्रमा राखेर बनाउनुपर्ने बताए। “पर्यटकीय स्थलहरूको प्रचारप्रसार र ब्रान्डिङ अपरिहार्य छ,” उनले भने, “यस क्षेत्रमा पर्यटकीय सम्भावनाहरू प्रशस्त भए पनि अपेक्षित प्रचारप्रसार हुन सकेको छैन।”
कार्यक्रममा सरोकारवालाहरूले मधेशमा पर्यटन प्रवर्द्धन गर्न आवश्यक पूर्वाधारको विकास र प्रचारप्रसारलाई प्राथमिकतामा राख्नुपर्नेमा जोड दिएका थिए।
