हमासको आक्रमणमा तीन इजरायली सेना मारिए, वार्ता निश्कर्षविहीन
प्यालेस्टिनी लडाकु समूह हमासको आक्रमणमा परी तीन इजरायली सेना मारिएका छन् । इजरायल र गाजाको बीचमा पर्ने एक प्रहरी चौकीमा भएको रकेट हमलामा आफ्ना तीन सैनिक मारिनुका साथै केही घाइते भएको इजरायलले जनाएको छ ।
हमासको आक्रमणपछि इजरायलले गाजा प्रवेश गर्ने केरेम शालोम नाका बन्द गरेको छ । यो गाजामा खाद्यान्न र चिकित्सा आपूर्तिहरू सहित मानवीय सहायता प्राप्त गर्ने केही मार्गहरू मध्येको एक हो।
यसअघि, इजरायल र हमासबीच इजिप्टमा भएको वार्ता निष्कर्षविहीन भएको थियो । वार्ता निष्कर्षविहीन हुनुमा दुवै पक्षले एकअर्कालाई आरोप लगाएका छन् ।
इजिप्टका मध्यस्थकर्ताहरूले गाजामा युद्धविराम र हमासद्वारा बन्धकहरूलाई रिहाइ गर्ने सम्झौताका लागि कायरोमा दुई दिनको वार्ता गरेका थिए ।
एक विज्ञप्तिमा, हमासले पछिल्लो चरण आइतबार समाप्त भएको र उसको प्रतिनिधिमण्डल अब समूहको नेतृत्वसँग परामर्श गर्न कायरोबाट कतार जाने बताएको छ।
बीबीसीका अनुसार मध्यस्थता प्रयासमा संलग्न सीआईए प्रमुख विलियम बर्न्स कायरोबाट कतारको राजधानी दोहामा वार्ताका लागि प्रस्थान गरेका छन् । अनुसार।
युद्धविरामको प्रस्तावमा बन्धकहरूलाई रिहा गर्दा ४० दिनको लडाइँमा रोक लगाउने र इजरायली जेलहरूमा बन्दी रहेका प्यालेस्टिनी कैदीहरूको रिहाइलाई आधार बनाइएको बताइएको छ ।
