नेपाल प्रिमियर लिगमा सट्टेबाजीको विज्ञापन, के गर्दैछ प्रहरी ?
नेपालको सबैभन्दा ठूलो घरेलु क्रिकेट प्रतियोगिता नेपाल प्रिमियर लिग (एनपीएल) मा सट्टेबाजीलाई प्रवर्द्धन गरेको आरोपमा आयोजकहरूलाई सचेत गराइएको छ। त्रिभुवन विश्वविद्यालय क्रिकेट मैदानमा जारी प्रतियोगिताका विज्ञापनहरूलाई लिएर प्रहरी र विज्ञापन नियमन गर्ने सरकारी निकायले चासो देखाएका छन्।
क्रिकेट मैदान वरपर र केही टोलीका जर्सीहरूमा राखिएका विज्ञापनहरूमा सट्टेबाजी साइटहरूसँग सम्बन्धित नाम समावेश भएको आरोप लागेको छ। न्यूजु लेखिएको एउटा विज्ञापनमा सट्टेबाजी वेबसाइटको संकेत भएको देखिए पनि आयोजक नेपाल क्रिकेट सङ्घ (क्यान) ले यो सरगेट विज्ञापन (प्रत्यक्ष रूपमा सट्टेबाजी नभई अन्य उत्पादनको प्रचार) भएको दाबी गरेको छ।
सरकारी निकायको हस्तक्षेप
नेपाल प्रहरीको केन्द्रीय अनुसन्धान ब्यूरो (सीआईबी) का अनुसार मैदानमा सट्टेबाजी साइटको विज्ञापनबारे अनुसन्धान भइरहेको छ। प्रहरीले प्रतियोगितामा सट्टेबाजी गतिविधि भइरहेको आशङ्कामा सात जना भारतीय नागरिकलाई पक्राउ गरेको छ। उनीहरूले फिल्डमै बसेर चौका, छक्का वा रनको अड्कलबाजीमा संलग्न रहेको प्रहरीले जनाएको छ।
“सट्टेबाजी साइटसँग सम्बन्धित विज्ञापन कानुनविपरीत छ। विज्ञापन राख्ने प्रक्रियाबारे सूक्ष्म अनुसन्धान भइरहेको छ,” सीआईबीका प्रवक्ता होविन्द्र बोगटीले भने।
नेपालको मुलुकी अपराध संहिताले सट्टेबाजीलाई कानुनविरुद्ध मानेको छ। दोषी ठहरिएमा एक वर्ष कैद र कारोबार रकमको आधारमा जरिवाना हुन सक्ने प्रावधान छ।
विज्ञापन नियमन बोर्डका अध्यक्ष लक्ष्मण हुमागाईँले सट्टेबाजीसँग सम्बन्धित विज्ञापन राखिएको उजुरीपछि क्यानलाई दुई पटक पत्राचार गरिएको जानकारी दिए। “सरगेट विज्ञापन भए पनि यसले नेपालमा सट्टेबाजी प्रवर्द्धन गर्ने जोखिम देखिएको छ,” उनले भने।
क्यानका प्रवक्ता छुम्बी लामाले सरगेट विज्ञापनको प्रयोग अन्तर्राष्ट्रिय अभ्यासमा सामान्य भएको दाबी गरेका छन्। “आईसीसी र एसीसीले आयोजना गर्ने खेलहरूमा पनि यस्ता विज्ञापन राखिन्छन्। क्यानले कुनै गैरकानुनी काम गरेको छैन,” लामाले भने।
लामाका अनुसार सट्टेबाजीसँग सम्बन्धित भनिएका साइटहरूले नेपालमा समाचार पोर्टलका रूपमा मात्र काम गर्ने बताए। “एनपीएलले घरेलु क्रिकेटलाई राम्रो स्थानमा पुर्याएको छ। यसलाई बदनाम गराउने प्रयास भइरहेको छ,” उनले दाबी गरे।
प्रहरीको सतर्कता
प्रहरीले यस्तो विवादका लागि जिम्मेवार व्यक्तिहरूविरुद्ध थप अनुसन्धान गरिरहेको र गैरकानुनी गतिविधिमा संलग्न देखिए कानुनी कारबाही हुने बताएको छ।
सट्टेबाजीसँग सम्बन्धित विज्ञापनले नेपालमा कानुनी र नैतिक विवाद सिर्जना गरेको छ। क्यानले प्रायोजकको चयनमा अन्तर्राष्ट्रिय अभ्यासअनुसार निर्णय गरेको बताउँदै आए पनि सरकारी निकायहरूले यसलाई गम्भीर चासोको विषय बनाएका छन्।
