‘कार्साङ’को मुख्य अभिनेता जितु कि दयाहाङ ?
आगामी पुस २६ गते रिलिज हुने फिल्म कार्साङ ले हालै पोस्टर र क्यारेक्टर लुक्स सार्वजनिक गरेको छ। निर्माण पक्षले सर्वप्रथम दयाहाङ राई फिचर्ड पोस्टर सार्वजनिक गरेपछि, क्रमशः जितु नेपाल फिचर्ड पोस्टर र त्यसपछि जितु नेपाल र दिया मास्के फिचर्ड पोस्टर सार्वजनिक गरेको हो।
यससँगै फिल्मको मुख्य पात्र दयाहाङ राई हुन् या जितु नेपाल भन्ने विषयमा कौतूहल बढेको छ। पछिल्ला दिनमा जितु नेपाल निरन्तर मुख्य भूमिकामा देखिँदै आएका छन्। विशेषगरी दशैंको अवसरमा रिलिज भएको ज्वाइँसाब मा मुख्य भूमिका निभाएका जितुले राम्रो सफलता पाएका थिए।
कार्साङ फिल्म यम शेर्पाको लेखन तथा निर्देशनमा तयार भएको डेब्यु प्रोजेक्ट हो। यो फिल्म शेर्पा समुदायको समृद्ध संस्कृति र जीवनशैलीमा आधारित रहेको छ।
फिल्ममा दयाहाङ राई, जितु नेपाल, सिर्जना निङ्लेखु, दिया मास्के, बुद्धि तामाङ, सृष्टि गौतम, डोमा ह्योल्मो, प्रेम लोप्चन र सुरवीर पण्डित लगायतका कलाकारहरूको अभिनय छ।
यार्सा फिल्म्स र पुरुषोत्तम प्रधान फिल्म्सको ब्यानरमा निर्मित यो फिल्मको निर्माण र छायांकन पुरुषोत्तम प्रधानले गरेका हुन्। सहनिर्मातामा गोविन्द बोहरा छन् भने कार्यकारी निर्माता आङछिरिङ शेर्पा र लाइन प्रोड्युसरको भूमिकामा वीरेन्द्र शाही छन्।
