विष्णुप्रसाद काफ्ले : स्वदेशी उत्पादन प्रवद्र्धन र ग्राहकमैत्री उद्यमका अभियन्ता

अभियान डिजिटल वल्र्ड प्रालिमार्फत विद्युतीय सामाग्रीको उत्पादन र बितरणमा लागि परेका उद्यमी विष्णुप्रसाद काफ्ले स्वदेशकै स्रोत, साधन र जनशक्तिको उपयोगमार्फत उद्यमशीलताको अनुसरणीय काम गरिरहेका छन् ।

स्वदेशी बजारमा बाहिरका ब्राण्डले महँगोमा सामान बेचिरहेको देखेर पीडा बोध गरेका काफ्लेले विद्युतीय सामानको स्वदेशमै एसेम्बल गरी ग्राहकलाई सुपथ मूल्यमा उपलब्ध गराउने उद्देश्यले अहिले ‘अभियान’ ब्राण्डमै टेलिभिजन, वासिङ मेसिन र कुलर बजारमा ल्याएका छन् । अहिले टेलिभिजनको बजारीकरणमा बढी केन्द्रित अभियानले न्यून आय भएका ग्राहकलाई लक्षित गरी किस्ताबन्दी योजनासमेत ल्याएको छ ।

ग्राहकमैत्री बजारीकरण नीति

बाहिरबाट आएका ब्राण्डले उत्पादनको ब्राण्डिङमा पर्याप्त खर्च गरेका छन् । तर, अभियानको बजारीकरणको तरिका फरक छ । यसले विज्ञापनमा हुने खर्च कटाएर त्यसको लाभ ग्राहकलाई दिने रणनीति लिएको छ ।
आफ्नै शोरुममार्फत वा सिधैं ग्राहकसम्म पुगेर उत्पादन बेच्ने रणनीति लिएको अभियान डिजिटल वल्र्डका अध्यक्षसमेत रहेका काफ्लेले बताए ।

‘विज्ञापन र तहगत बितरक बिक्रेतालाई दिइने खर्च हामीले ग्राहकलाई नै छुट र अन्य ‘स्किम’का माध्यमबाट दिइरहेका छौं । यसले ग्राहक लाभान्वित भइरहेका छन्,’ उनले भने । विगत २५ वर्षदेखि उत्पादनमा सक्रिय काफ्लेले विद्युतीय सामग्रीको व्यापार र उत्पादनका क्षेत्रका अनुभवीहरूसँगको सहकार्यमा यो अभियान चलाएका हुन् ।

‘हामीले यसमा क्षेत्रगत अनुभव भएका साथीहरु एक ठाउँमा आएर काम गरिरहेका छौं । सबैले आआफ्नो दक्षताअनुसार कामको जिम्मेवारी बाँडेका छौं,’ उनले भने । विद्युतीय सामग्रीका पार्टपूर्जा स्वदेशमै ल्याएर एसेम्बल गर्दा सस्तोमा उत्पादन हुने र त्यसको लाभ ग्राहकसम्म पु¥याउन सकिने भएपछि अभियानले एसेम्बललाई अघि बढाएको हो ।

निकट भविष्यमा १ टन क्षमताको एअरकन्डिसन उत्पादन गर्ने र यसलाई बजारको तुलनामा सस्तोमा ग्राहकको घरघरमा पुर्‍ याउने योजना उनले सुनाए । विद्यालयमा अध्ययन अध्यापनका लागि प्रयोग हुने स्मार्ट बोर्ड उत्पादनको योजनामा अभियान लागिपरेको छ ।

बेग्लै आयाम टीएमसी

स्थानीय किसान र कृषिकर्मसँग लगाव राख्ने काफ्लेले जडिबुटीमा आधारित साबुन, ग्लिसिरिन, हेअर आयल, ह्याण्डवास, डिसवास, सरफ, दन्तमञ्जन, क्रिम, टायल, मार्बल र बाथरुम क्लिनरलगायतका दर्जन बढी उत्पादन पनि बजारमा ल्याएका छन् ।

अहिले काठमाडौं र चितवनको बजारमा उत्पादन पु¥याइएको र ग्राहकबाट उत्साहजनक प्रतिक्रिया पाएको उनले बताए । अन्य बजारमा विस्तारको क्रम जारी रहेको जानकारी पनि दिए ।
यी उत्पादनहरु टोलमार्ट कम्पनीबाट ‘टीएमसी’ ब्राण्डमा बजारमा उपलब्ध छन् । ‘टोलटोलमै उत्पादन पु¥याउने अवधारणाबाट उत्पादनको बजारीकरण गरिरहेका छौं,’ काफ्लेले भने ।

टीएमसीले आफ्ना उत्पादनमा अधिकाशंतः स्थानीय उत्पादनमा आधारित कच्चा पदार्थको प्रयोग गर्दै आएको छ । ‘यहीँका किसानले उत्पादन गरेको र स्थानीय स्तरमा पाइने जडिबुटीको प्रयोग गरी उत्पादन भइरहेको छ,’ उनले भने ।
अपेक्षा सरकारी संरक्षणको
सरकारले संरक्षणको नीति लिने हो भने स्थानीय उद्योगले किसान र कृषिलाई उद्यमसँग जोड्नुको साथै उपभोक्तालाई सस्तो मूल्यमा उत्पादन आपूर्ति गर्न सक्ने दाबी काफ्लेको छ ।

नेपाल जनसंख्याको हिसाबले सानो बजार भए पनि खपतका दृष्टिले ठूलो सम्भावना भएको उनको अनुभव छ । विश्व बजारले नेपालको बजारलाई प्राथमिकतामा राखेको बेला राज्यको नीति सही हुने हो भने स्वदेशी उद्योग फस्टाउन सक्ने उनले बताए ।

‘हाम्रा उत्पादन भारत र चीनजस्ता ठूला देशमा लैजान सक्छौं । जापान, मलेसियाजस्ता देशमा हाम्रो साबुन रुचाइएको छ । तर, यसका लागि सरकारले स्वदेशका उद्योगलाई संरक्षणको नीति लिनु पर्दछ । किसान र किसानको कर्मसँग जोडिएका उद्यमलाई प्रोत्साहनको नीति सरकारले लिनु पर्दछ,’ अध्यक्ष काफ्लेको आग्रह छ, ‘नेपालबाट कैयौं जडिबुटी कौडीको भाउमा बाहिर गएर तयारी बस्तुको रुपमा महँगो मूल्यमा फेरि हाम्रै बजारमा आएको छ । सरकारले स्वदेशका उद्योगलाई जोगाउन चासो नदेखाएपछि बाहिरकाले फाईदा उठाएका छन् । यो अवसरको उपयोग हामीले गर्न सक्छौं ।’