प्रत्येक वर्ष कन्या अर्थात् आश्विन सङ्क्रान्तिका दिन आज कालिगडहरूले विश्वकर्माको पूजा आराधना गरी वास्तु दिवस एवं विश्वकर्मा पूजा पर्व मनाउँदैछन् ।
विभिन्न कलकारखानामा विश्वकर्मा भगवानको बालुवाको मूर्ति वा तस्बिरमा विधिपूर्वक पूजा आराधना गरी यो दिवस मनाउने गरिन्छ ।
कलकारखानालाई विशेष रूपमा सजाएर मजदुरलाई समेत सहभागी गराएर यो दिवस मनाइन्छ । बालुवा अन्य चीजबाट बनाइएको विश्वकर्माको मूर्ति वाग्मती मुहानस्थल सुन्दरीजल वा अन्य शुद्ध स्थलमा लगी सेलाउने गरिन्छ ।
औद्योगिक कोरिडोरहरुमा आज पूजाको विशेष उल्लास देखिन्छ । तर, यस पटक उद्योगहरुको उत्पादन र बजारमा देखिएको मन्दीको असर पूजामा पनि देखिएको छ ।
विगतमा वर्षहरुमा निकै उल्लासका साथ पूजा गरिनेमा यस वर्ष उद्योगीहरुले पूजामा समेत खर्च कटौति गरेका छन् । उद्योगको उत्पादन नै एक चौथाइमा झरेपछि उल्लासमा कमी आएको बारा पर्सा औद्योगिक कोरिडोरका एक उद्योगीले बताए ।
आज पूजा गरी मङ्गलवारदेखि नदीमा लगी मूर्ति सेलाइन्छ । आजका दिन कालिगडले उपयोगमा ल्याउने विभिन्न औजारका सामानमा पूजा आराधना गरेमा धेरै समय टिक्ने, कामका बेलामा नबिग्रने र राम्रो काम गर्न सकिने लगायत गुण प्राप्त हुने धार्मिक विश्वास छ ।
द्वापर युगमा भगवान् कृष्णलाई राक्षसहरूले दुःख दिएपछि विश्वकर्माले समुद्रको बीचमा ‘भेद द्वारका’ बनाइ लुकाएको धार्मिक विश्वास छ ।
