कोरोनाकालमा भ्रष्टाचार गर्ने भियतनामका पूर्वमन्त्रीसहित उच्च अधिकारी जेल चलान, नेपालमा भने संरक्षण ?

कोरोना कहरमा जनता एउटा सिटामोलका तड्पिइरहेको बेला सरकारका उच्च पदस्थहरु औषधि र उपचार सामग्रीको कमिशनको खेलमा लागेका थिए । यसमा ओम्नी समूहदेखि नेपाली सेनासमेत विवादमा आए ।

तर, यत्रो लापरवाही र अनियमितताको विषय अहिले बेखबर बनिरहेको अवस्थामा भियतनामको एउटा अदालतले देशको अहिलेसम्मकै सबैभन्दा ठूलो सामूहिक घुसखोरी र भ्रष्टाचार मुद्दामा एक पूर्वमन्त्रीसहित कैयौं उच्च पदस्थ अधिकारीलाई जेल चलान गरेको समाचार आएको छ ।

बीबीसी अंग्रेजीले प्रकाशित गरेको खवर अनुसार अदालतले ५४ जनालाई जेल सजाय सुनाएको छ।
फैसला सुनाउँने न्यायाधीशहरूका अनुसार अभियुक्तहरूले कोभिड १९ महामारीको समयमा हवाई मार्फत स्वदेश फिर्ता हुने मानिसहरूबाट पैसा असुलेका थिए।

भियतनाम सरकारले पछिल्लो समय देशभर भ्रष्टाचार विरूद्धको अभियान चलाएको छ । यहि अभियानका विच अदालतको यो फैसला आएको हो ।

दुई हप्ताभन्दा बढीको सुनुवाइपछि त्यहाँको हनोईको अदालतले दर्जनौं पूर्वअधिकारीहरू, वरिष्ठ कूटनीतिज्ञहरू र एक पूर्व उप विदेश मन्त्री सहित घूस, ठगी र पदको दुरुपयोगमा संलग्न भएकोमा दोषी ठहर गर्दै अदालतले प्रतिवादीहरूलाई गम्भीर सजाय दिनुपर्ने भनेको छ।

महामारीको समयमा भियतनामी नागरिकहरू हवाई यात्रामार्फत स्वदेश फर्कन चाहन्थे तर सो समय व्यावसायिक उडानमा यात्रा उपलब्ध थिएन। प्रतिवादी कूटनीतिज्ञ र व्यवसायीहरूले योजना नै बनाएर विदेशमा रहेका भियतनामी नागरिकहरूबाट पैसा असुलेका थिए ।

महामारीको समय स्वदेश फर्कन चाहाने नागरिक सहित सबै यात्रुहरू फिर्ता ल्याउन सरकारले २०२० को शुरुमा लगभग ८०० उडानहरू सञ्चालन गरेको थियो।

त्यहाँको सरकारी अखबार भीटीसी का अनुसार २५ सरकारी अधिकारीहरू कुल ७.४ मिलियन अमेरिकी डलरभन्दा बढी अवैध सरकारी तलव सुविधा समेत लिएको पाइएको जनाएको छ ।

एक पूर्वमन्त्रीलाई ९ लाख अमेरिकी डलर अर्थात ११ करोड ७९ लाख बढी नेपाली रूपैयावरावर घुस लिएको आरोपमा १६ वर्षको जेल सजाय सुनाइएको छ।

फैसलामा परराष्ट्र, स्वास्थ्य र सार्वजनिक सुरक्षा मन्त्रालयका चार पूर्व उच्च पदस्थ अधिकारीलाई आजीवन कारावासको सजाय सुनाइएको छ ।

१० व्यापारी र अन्य सहयोगीलाई निलम्बन गरिएको छ। उप(स्वास्थ्य मन्त्रीका पूर्व सचिव फाम ट्रुङ किएन र परराष्ट्र मामिलाका पूर्व उपमन्त्री टो आन्ह डङ यस घोटालाका केही उच्च प्रोफाइल नामहरू हुन्।

मुद्दामा किएनलाई मृत्युदण्डको माग गरिएको थियो जसले ११ महिनाको अवधिमा कुल १.८ मिलियन डलर मूल्यको २५३ पटक घूस लिएको आरोपमा जन्मकैद पाएका थिए।

अदालतमा १६ वर्षको जेल सजाय पाएका डंगले उडान संख्या थप्न उडान प्रदायकहरूबाट लाखौं डलरको घुस लिएको बताएको तथा उडान सकिएपछि भुक्तानी पाएको स्वीकार गरेका छन् ।

त्यतिबेला मैले केही गल्ती गरेछु भन्ने सोचेको थिइनँ, उनले भने, स्वदेश फिर्ता गर्न सहयोग पुर्‍याउन मद्दत गरिरहेका थिए।

आठ अधिकारीलाई घुस दिएको आरोप लागेकी एक व्यवसायीले परराष्ट्र मन्त्रालयमा कसैले पनि पैसा दिन नभनेको बताएकी छन् । अर्का आरोपी होआङ डिउ मोले भने हामीले स्वीकृति र अनुमतिको लागि उनीहरूलाई घूस दिनु पर्छ ताकि उडानहरू समयमै होस् । उनलाई सात वर्षको सजाय तोकिएको छ।

भ्रष्टाचार विरुद्धको ठूलो क्रर्‍याकडाउनको बीचमा यो सजाय सुनाइएको छ । जसले सयौं अधिकारीहरूलाई अनुसन्धानमा तानेको छ।

दुई उपप्रधानमन्त्रीसहित धेरैले राजीनामा समेत दिएको खवर छ । यस वर्षको जनवरीमा पूर्व राष्ट्रपति गुएन सुआन फुकले अचानक राजीनामा दिन बाध्य भएका थिए । हामीकहाँ भने महामारीमा खुलेआम भ्रष्टाचार गर्ने खुलेआम हिँडिरहेका छन् ।

जनता औषधि, भेन्टिलेटर, एक सर्को अक्सिजन र खोपका लागि तड्पिँदा सरकारका बस्नेहरु भने कमिशनको चक्करमा थिए । यस्तालाई कारवाहीबाट बचाउन तत्कालीन सरकारका हर्ताकर्ताहरु नै संरक्षणमा उत्रिएका थिए ।