दिल्लीलाई हराउँदै चेन्नई प्लेअफमा
इण्डियन प्रिमियर लिग (आईपीएल) मा चेन्नई सुपर किङ्ग्सले प्लेअफमा स्थान बनाएको छ । समूह चरणको अन्तिम खेलमा दिल्ली क्यापिटललाई ७७ रनले हराउँदै चेन्नईले प्लेअफमा स्थान पक्का गरेको हो ।
जितका लागि २ सय २४ रनको विशाल विजयी लक्ष्य पछ्याएको दिल्लीले निर्धारित २० ओभरमा ९ विकेट गुमाउँदै १ सय ४६ रन बनायो ।
चेन्नईका लागि तीव्र गतिका बलर दीपक चाहरले ३ विकेट, महेश पाथिरानाले २ विकेट लिए । तुषारदेश पाण्डे र रविन्द्र जडेजाले समान एक विकेट लिए ।
त्यसअघि टस जितेर पहिला ब्याटिङ रोजेको चेन्नईले निर्धारित २० ओभरमा ३ विकेट गुमाउँदै २ सय २३ रन बनाएको थियो ।चेन्नईको सुरुवात निकै राम्रो रह्यो । ओपनरद्वय ऋतुराज गायकवाड र डेवोन कन्वेले पहिलो विकेटका लागि १४१ रनको साझेदारी गरे । कन्वेले ५२ बलमा ११ चौका र ३ छक्कासहित ८७ रन र गायकवाड ५० बलमा ३ चौका र ७ छक्कासहित ७९ रन बनाए ।
शिवम दुबे ९ बलमा ३ छक्कासहित २२ रनमा आउट भए । रविन्द्र जडेजा ७ बलमा ३ चौका र १ छक्कासहित २० रनमा नटआउट रहे ।धोनी ४ बलमा ५ रनमा नटआउट रहे ।
दिल्लीका लागि खलिल अहमद, एनरिच नोर्किया र चेतन सकारियाले समान एक विकेट लिए ।
यो जितसँगै चन्नईले १४ खेलबाट १७ अंक जोडेको छ र अंक तालिकाको दोस्रो स्थानमा छ । हारपछि दिल्ली भने १० अंकका साथ प्रतियोगिताबाटै बाहिरिएको छ ।
