वरिष्ठ उद्योगपति क्याल मधेस प्रदेशको आर्थिक तथा औद्योगिक सल्लाहकार नियुक्त (पत्रसहित)
वरिष्ठ उद्योगपति सत्यनारायण क्याल मधेस प्रदेश सरकारको आर्थिक तथा औद्योगिक सल्लाहकारमा नियुक्त हुनुभएको छ ।
मधेस प्रदेश सरकारले उद्योगी क्याललाई प्रदेशको सल्लाहकारमा नियुक्त गरेको हो । मधेस प्रदेशका मुख्यमन्त्री लालबाबु राउतले आज क्याललाई आर्थिक तथा औद्योगिक सल्लाहकारमा नियुक्ति पत्र पठाउनुएको हो ।
औद्योगिक तथा व्यापारिक समूह क्याल ग्रुपका अध्यक्ष रहेका क्याल ३ दशकभन्दा लामो समयदेखि औद्योगिक र व्यापारिक गतिबिधिमा सक्रिय रहँदै आउनुभएको छ । मधेस प्रदेश मन्त्रिपरिषद्को यही माघ २० गतेको बैठकले क्याललाई सल्लाहकारमा नियुक्त गर्ने निर्णय गरेको थियो ।
निजीक्षेत्रका अनुभवी व्यक्तित्वलाई सल्लाहकारमा समेटेर प्रदेशको औद्योगिक र आर्थिक विकासका लागि उद्योगपति क्याललाई सल्लाहकार बनाइएको प्रदेश सरकारले बताएको छ ।
मधेस प्रदेशको औद्योगिक विकासका लागि आवश्यक नीति निर्माणमा सल्लाह र सुझाव लिन क्याललाई सल्लाहकार नियुक्त गरेको मुख्यमन्त्री राउतको पत्रमा उल्लेख छ । प्रदेशको समग्र विकासका लागि योजना तर्जुमालगायत आर्थिक विषयमा सल्लाह सुझाव लिइने पत्रमा उल्लेख गरिएको छ ।
