आयातनिर्यातका हिसाबले मुख्य नाकास्थित वीरगञ्ज भन्सारबाट चालू आर्थिक वर्ष (आव) २०७८/७९ को पहिलो चौमासिक अवधिमा भारतसितमात्रै करीब सवा खर्ब रुपैयाँ व्यापारघाटा भएको छ ।
वीरगञ्ज भन्सार कार्यालयका अनुसार चालू आवको साउनदेखि कात्तिक महीनासम्ममा भारतसितको आयातनिर्यात व्यापारको आँकडा १ खर्ब २० अर्ब रुपैयाँबराबरको नोक्सानीमा देखिएको हो ।
बितेको ४ महीनामा भारतबाट वीरगञ्ज भन्सार हुँदै १ खर्ब ५८ अर्ब रुपैयाँबराबरको बस्तु आयात भएको छ । यही अवधिमा भारततर्पm भने ३८ अर्ब रुपैयाँबराबरको मालसामान निकासी भएको वीरगञ्ज भनसारको सूचना तथा प्रविधि शाखाको तथ्यांकले देखाउँछ ।
भारत नेपालको सबैभन्दा ठूलो व्यापार साझेदार पनि हो । नेपालले गर्ने आयातमा सबैभन्दा बढी परिमाण भारतबाटै आउँछ । निकासीसमेत भारतमै हुने वीरगञ्ज भन्सारका प्रमुख भन्सार अधिकृत हरिहर पौडेल बताउँछन् ।
वीरगञ्ज भन्सारमार्पmत भएको आयातनिर्यातमा भारतसितको व्यापारघाटा कुल घाटाको करीब ६५ प्रतिशत हो । चालू वर्षको पहिलो ४ महीनामा वीरगञ्ज नाकाबाट कुल व्यापारघाटा १ खर्ब ८५ अर्ब रुपैयाँबराबर छ ।
यस अवधिमा यो भन्सार हुँदै कुल वैदेशिक व्यापार २ खर्ब ६४ अर्ब रुपैयाँको भएको थियो । २ खर्ब २४ अर्ब रुपैयाँको आयात हुँदा निर्यात ३९ अर्ब ५६ करोड रुपैयाँबराबर छ ।
भन्सारको तथ्यांकले निकासीको सबैभन्दा ठूलो बजार पनि भारत नै भएको देखाएको छ । यो भन्सारबाट ४ महीनामा भएको कुल निकासीमध्ये ९६ प्रतिशत भारतमै गएको देखिन्छ ।
भारतपछि दोस्रो ठूलो व्यापार साझेदार चीनबाट यो अवधिमा १३ अर्ब रुपैयाँको मालसामान भित्रिँदा १ करोड ३० लाख रुपैयाँको निर्यात भएको छ । वीरगञ्ज भन्सार कार्यालय हुँदै ३३ देशसँग व्यापार भएकोमा चेक रिपब्लिक, नर्वे, आयरल्यान्ड र स्वीडेनसँगको व्यापारमा भने व्यापार मुनाफा देखिएको छ ।
गत आव २०७७/७८ को पहिलो ४ महीनामध्ये २ महीना कोरोना महामारीको त्रास, यसको नियन्त्रणका लागि लगाइएको बन्दाबन्दी र निषेधाज्ञामा बितेको र त्यसपछिका २ महीना पनि बजार अन्योलमै रहेकाले व्यापार न्यून भएको थियो ।
चालू वर्षमा भने व्यापार बढेको छ । अघिल्लो समीक्षा अवधिमा बन्दाबन्दीको असरले वैदेशिक व्यापार खुम्चिएको थियो । चालू वर्ष बजारमा माग बढेसँगै व्यापारको आकार पनि उकालो लागेको भन्सार अधिकारीहरू बताउँछन् ।
वीरगञ्ज नाकाबाट मुख्य रूपमा पेट्रोलियम पदार्थ, सवारीसाधन, यसका पार्टपुर्जा, औद्योगिक कच्चा पदार्थ र खाद्यान्न आयात हुन्छ । निकासीतर्पm प्रशोधित तेल, जुसजाम, कपडा, धागो, गलैैंचा, कार्पेटलगायत छन् । आर्थिक अभियानबाट
