नेपाल पक्षको रणनीति : अहिले दल विभाजन, ओली सुध्रिए चुनावमा सहकार्य
काठमाडौं-दल विभाजनका लागि सरकारले अध्यादेश जारी गर्ने निर्णय गरेपछि नेकपा एमाले नेता माधवकुमार नेपाल समूहले नयाँ पार्टी खोल्ने तयारी थालेको छ ।
आफू निकट जनवर्गीय संगठनको भेलालाई सम्बोधन गर्दै नेता नेपालले अब नयाँ अभ्यासमा जाने उद्घोष गरेका हुन् । उनले एजेण्डा मिल्नेहरूसँग एकताको ढोका भने सधैं खुल्ला राख्ने उल्लेख गरेका थिए ।
‘हामीले फेरि नयाँ पार्टी खोलिहाल्यौंं भने एकताको ढोका खुल्ला हुनेछ,’ नेता नेपालले भेलालाई सम्बोधन गर्दै भने, ‘तीन महिना एक वर्षपछि भेट पनि हुन सक्छ ।’
सम्बोधनकै क्रममा उनले पार्टी विभाजनका लागि अध्यक्ष केपी ओली नै उद्यत भएको आरोप लगाए ।
‘उहाँ पार्टी विभाजनका लागि उद्दत हुनुभएको छ, उहाँले नै एकताको ढोका बन्द गर्नुभो,’ नेपालले भने ।
उनले अब आफूहरु पार्टीलाई पुनर्गठन गर्नुपर्ने अवस्थामा पुगेको बताए । क्रान्तिकारी पार्टीमा रुपान्तरण गरिने बताउँदै उनले भने, ‘आन्दोलनको झण्डा बुलन्द गरिनेछ । नेपाली जनताको प्यारो शक्तिका रुपमा बनाइने छ ।’
उनले तत्काल अरु पार्टीसँग एकताको सम्भावना नरहेको बताए । उनले भने, ‘अरु पार्टीसँग एकताको सम्भावना छैन, सहकार्य हुनसक्छ । कारबाहीबाट हामी विचलित हुने छैनौँ ।’
केपी ओलीले आत्मालोचना गरेर, गल्ति स्वीकारेर आए एकताका लागि कहिल्यै पनि ढोका बन्द नहुने उनले बताए । अब हुने एकता ‘सही विचारमा आधारित एकता’ हुने उनको भनाइ छ ।
उनले चुनावमा सिटको तालमेल गरेर जान सकिने र चुनाव पछि पनि भेट हुने सम्भावना भने रहेको समेत बताए । हाललाई पार्टीबाट अलग भएर तत्काल अन्य दलमा आवद्ध नहुने उनको भनाइ थियो ।
उनले देशव्यापी रुपमा संगठन विस्तारका लागि सक्रिय हुन निर्देशन दिए ।
