काठमाडौ– जनता समाजवादी पार्टी (जसपा) को आधिकारिकता विवाद निर्वाचन आयोगले आज (सोमबार) टुंग्याउने तयारी गरेको छ । जसपाको कार्यकारिणी समितिको ‘हेड काउन्ट’ गरेर आयोगले आधिकारिकता विवाद टुंग्याउन लागेको हो ।
जसपाका उपेन्द्र यादव र महन्थ ठाकुर दुवै पक्षले आफू आधिकारिक रहेको दाबी गर्दै आएका छन् । उनीहरुले समानन्तर ढंगले पार्टी सञ्चालन गर्दै आएका छन् ।
राजनीतिक दलसम्बन्धी ऐनमा लिखित जवाफ र प्रमाणको आधारमा कुनै पक्षलाई मान्यता दिने अवस्था नरहे केन्द्रीय समितिमा बहुमत रहेको पक्षलाई दलको आधिकारिकता दिने प्रावधान छ ।
जसपाको ५१ सदस्यीय कार्यकारिणी समितिमा यादव समूह बलियो देखिएको छ । यादव समूहले ५१ मध्ये ३१ जना सदस्यलाई अइतबार नै लगेर रिसोर्टमा राखेको छ ।
कार्यकारिणी सदस्य र सांसदको बहुमत पुर्याउन अर्को पक्षले चलखेल गर्न सक्ने भन्दै यादब समूहले प्रशिक्षणको नाममा कार्यकारिणी सदस्य तथा सांसदहरुलाई रातभर नै गोदाबरी रिसोर्टमा राखेको हो । उनीहरू सोमबार रिसोर्टबाट सिधै आयोग जादैछन् ।
‘हेडकाउन्ट’ रोक्न अन्तरिम आदेश माग गर्दै सर्बोच्च पुगेको ठाकुर पक्षको मागलाई अदालतले अन्तरिम आदेश दिन अस्वीकार गरेको छ । यसले ठाकुर पक्ष साख जोगाउने चुनौतिमा परेको छ ।
महन्थ ठाकुरले दिएको रिटमा सर्वोच्च अदालतले अन्तरिम आदेश दिन अस्वीकार गरेको हो । जसपाको विवाद निरुपण गर्न निर्वाचन आयोगले थालेको ‘हेडकाउन्ट’ रोक्न माग गर्दै ठाकुर पक्षले सर्वोच्चमा रिट हालेको थियो ।
सर्वोच्चले अन्तरिम आदेश दिन अस्वीकार गरेसँगै आयोगलाई विवाद निरुपणको फैसला सुनाउन बाटो खुलेको हो ।
ठाकुर पक्ष अब के गर्ने भन्ने रणनीति तय गर्न आन्तरिक छलफलमा जुटेका छन् । पहिलो पटक गत पुस ५ मा प्रतिनिधिसभा विघटन गरेपछि ओली सरकारविरूद्ध आन्दोलनमा गएको जसपा प्रतिनिधिसभा पुनर्स्थापनापछि भने अनौपचारिक रुपमा विभाजित छ ।
प्रतिनिधिसभा पुनर्स्थापनापछि अध्यक्ष महन्थ ठाकुर पक्षले ओलीलाई समर्थन गरेका थिए । ओलीले विश्वासको मत माग्दा तटस्थ बसेर ओलीलाई अदृष्य रुपमा सघाएका उनीहरु ओलीले पुनः प्रतिनिधिसभा विघटन गरेपछि उनको सरकारमा सभागी भएका थिए ।
अदालतले मन्त्रीहरुलाई हटाइदिएपछि यो समूहमा अन्योल बढेको थियो । सर्वोच्च अदालतले प्रतिनिधिसभा विघटन बदर गरेर ओलीलाई नै सत्ताबाट हटाइदिएपछि ठाकुर पक्षको राजनीतिक अझ संकटमा परेको छ ।
जेलमा रहेका सांसद रेशम चौधरीको रिहाई, संविधान संशोधन, नागरिकतालगायतमा मागमा ओली सकारात्मक भएको भन्दै उनको समर्थनमा उभिएका थिए । प्रतिनिधिसभा दोस्रो पटक पुनर्स्थापना भएर शेरबहादुर देउवा प्रधानमन्त्री बनेपछि देउवाको पक्षमा विश्वासको मत दिएको थियो ।
ओली कदको विरोधमा उत्रिँदै आएको यादव समूह अहिले सरकारमा जाने तयारीमा छ । पार्टीको आधिकारिकतासँगै यो पक्षमा को मन्त्री बन्ने भन्नेमा दौडधुप पनि जारी छ ।
ठाकुर पक्ष पार्टीभित्र भने चरम अविश्वासमा परेको छ । सत्ता र राजनीतिक दुवै संकटमा परेपछि यो समूह आफ्ना पुरानै मागलाई दोहोर्याएर प्रधानमन्त्री देउवाको ध्यानाकर्षण गराइरहेको छ । यतिबेला पार्टी र जनतामाझ आफ्नो विश्वास बचाउने चुनौतीमा छ ।
